Perzenthanada qaıtys bolǵan áıeldiń ólimine qatysty polıtsııa túsinik berdi
ALMATY. QazAqparat – Almatyda №1 perzenthanada bosanǵan jas áıeldiń ólimine qatysty qalalyq polıtsııa departamenti túsinik berdi, dep habarlaıdy QazAqparat tilshisi.
Áıeldiń óliminen soń Almaly aýdandyq polıtsııa basqarmasynyń tergeý bólimi QR QK 317-baby boıynsha sotqa deıingi tergeý jumystaryn bastady.
«Marqumnyń týystarynyń aryzyn kútpeı tergeý jumystary bastaldy. Sebebi oqıǵa bolǵan kúni tergeý toby sol jerge shaqyryldy. Birqatar sot-medıtsınalyq saraptama taǵaıyndaldy. Sonymen qatar, Qoǵamdyq densaýlyq saqtaý departamenti tekserý júrgizip jatyr. Sotqa deıingi tergeý aıasynda biz olardyń qorytyndysyn da kútetin bolamyz. Sodan soń adam ólimine kim aıypty ekeni anyqtalady. Eger áıeldiń qaıtys bolýyna dárigerler aıypty bolsa, QR QK 317 babynyń 1 bólimi boıynsha (medıtsınalyq qyzmetkerlerdiń fýnktsıonaldyq mindetin durys oryndamaý) qylmystyq jaýapqa tartylady. Jas áıeldiń ólimine ákelip soqtyrǵan faktorlardy anyqtaý úshin saraptamalyq zertteýlerdiń qorytyndysyn kútý kerek», - dedi qalalyq Polıtsııa departamentiniń resmı ókili Saltanat Ázirbek.
Aıta ketý kerek, qaıǵyly oqıǵa №1 perzenthanada 17 shildede bolǵan.
Bul týraly Instagram jelisinde qaıtys bolǵan áıeldiń sińilisi jazdy.
«Sýrette meniń ápkem. Dárigerlerdiń jaýapsyzdyǵynan kóz jumdy. №1 perzenthanada 17 shildede túngi saǵat 3:00-der shamasynda dárigerler kesar tiligin jasady. Ómirge qyz bala keldi. Biraq, anasy ózine ózi kele almady. Іshi aýyrdy. Alaıda dárigerler bári jaqsy, bul aýyrsyný bolady dep sendirdi. Biraz ýaqyttan soń ishten qan kete bastady. Keshki saǵat 5:00-de ony qaıtadan operatsııaǵa alǵan. Biraq kesh boldy. Ápkem qaıtys bolyp ketti. Artynda úsh balasy qaldy. Bizdiń qaıǵymyzdy sózben jetkizý múmkin emes», - dedi Albına Israılova.
Qalalyq Qoǵamdyq densaýlyq saqtaý basqarmasy bul oqıǵaǵa baılanysty keshendi komıssııa qurylǵanyn habarlady.
Qazir perzenthanada qyzmettik tekserý júrip jatyr.
