Perzenthana men aýrýhananyń biriktirilýi: Astanalyq dárigerler alǵashqy nátıjelerdi aıtty
ASTANA. QazAqparat - Elordadaǵy №1 perınıtaldyq ortalyq pen №2 aýrýhananyń biriktirilýiniń arqasynda dárigerler patologııalary bar 8 júkti áıeldi aman alyp qaldy, dep habarlaıdy QazAqparat tilshisi.
«Astana qalasy ákimdiginiń 22 tamyzdaǵy qaýlysymen №1 perınıtaldyq ortalyq pen №2 aýrýhana biriktirildi. Osynyń arqasynda qazirdiń ózinde eki aıdyń ishinde jaǵymdy kórsetkishterge qol jetkizdik. Qysqa ýaqyttyń ishinde aýyr ekstragenıtaldy patologııasy bar aıaǵy aýyr 8 áıeldiń ómirin qutqaryp qaldyq. Qyl ústinde turǵan olardyń ómirin akýsher-gınekologtardyń jáne salalyq mamandardyń birlesken shuǵyl ári jınaqy jumysynyń arqasynda arashalap qalý múmkin boldy», - deıdi №1 perınataldyq ortalyqta ótken baspasóz máslıhatynda Astana qalalyq Qoǵamdyq densaýlyq saqtaý basqarmasy basshysynyń orynbasary Álııa Rústemova.
Onyń aıtýynsha, Astana qalasynyń densaýlyq saqtaý salasyndaǵy ınfraqurylymyn damytýdyń naqty jospary bekitilgen. Oǵan sáıkes, monosalaly aýrýhanalardy kópsalaly aýrýhanalarmen biriktirý jumystary júrgiziledi.
«Meniń oıymsha, búgingi jaǵymdy nátıje osy baǵyttaǵy jumysty jalǵastyrý kerektigin kórsetip otyr. Bul, óziniń ozyq kórsetkishin áli de kórsetetin bolady», - dedi Álııa Rústemova.
Eske salaıyq, elordanyń medıtsına mamandary sırek kezdesetin dıagnozy bar jas anany qutqaryp qalǵan bolatyn. Osyǵan baılanysty №1 perınataldyq ortalyqta Astana qalalyq Qoǵamdyq densaýlyq saqtaý basqarmasynyń ókilderi baspasóz máslıhatyn ótkizip, kúrdeli otanyń qalaı júrgizilgenin aıtyp bergen edi.
Aıta keteıik, osy jyldyń maýsym-shilde aılarynda elordadaǵy №1 perınataldyq ortalyqta úsh áıel kóz jumǵan edi.
Arada kóp ótpeı 4 qyrkúıekte atalmysh perzenthanada taǵy bir ana kóz jumdy. Budan keıin perzenthananyń bas dárigeri qyzmetinen bosatyldy.
