Perzenthana qyzmetkeriniń vaktsınadan keıingi ólimi: Sot-medıtsınalyq saraptama júrgizilýde
NUR-SULTAN. QazAqparat – Koronavırýsqa qarsy vaktsınadan qaıtys bolǵan adam joq. Bul týraly QR Densaýlyq saqtaý vıtse-mınıstri Ajar Ǵınııat aıtty, dep habarlaıdy QazAqparat tilshisi.
«Qazirgi tańda koronavırýsqa qarsy vaktsınadan qaıtys bolǵan adam joq. Almatyda turatyn áriptesimiz týraly habardy biz de tekserdik. Eń aldymen mınıstrlik atynan áriptesimizdiń týma-týystaryna kóńil aıtamyz. Ekinshiden, ol vaktsına alǵannan keıin 2 kúnnen soń úıinde qulap qalyp, qaıtys bolǵan. Sot-medıtsınalyq saraptama júrgizilip jatyr. Almaty qalasynda qazir úlken komıssııa quryldy. Máıitti qaraǵan kezdegi alǵashqy saraptamaǵa sáıkes, «júrektiń ıshemııalyq aýrýynan qaıtys boldy» delingen dıagnoz bar. Ary qaraı komıssııa tekseredi. Sondyqtan qazir bul ólim koronavırýsqa qarsy vaktsınaǵa baılanysty dep aıta almaımyz», - dedi vıtse-mınıstr Ortalyq kommýnıkatsııalar qyzmetindegi brıfıng barysynda BAQ ókilderiniń saýalyna oraı.
Onyń atap ótýinshe, koronavrıýsqa qarsy vaktsına saldyrǵannan keıin janama áser bolsa, ol 30 mınýttyń ishinde baıqalady.
«Al bul eki kún ótkennen keıin bolǵan jaǵdaı. Sondyqtan jan-jaqty tekserilip, saraptama jasalýy tıis», - dedi Ajar Ǵınııat.
Aıta keteıik, buǵan deıin WhatsApp messendjerinde №4 perzenthana qyzmetkeri vaktsınatsııadan keıin qaıtys boldy degen vıdeo tarap, oǵan Almaty qalalyq sanıtarlyq-epıdemıologııalyq baqylaý departamenti basshysynyń orynbasary Sádýaqas Baıǵabylov túsinikteme bergen edi.
