«Pervyı kanal» arnasy Frıskeniń emdelýi úshin qarajat jınaýda
ASTANA. 22 qańtar. QazAqparat - «Pervyı kanal» arnasy Frıskeniń emdelýi úshin qarajat jınaýdy bastady. Reseılik ánshi, kınoaktrısa Janna Frıske qaterli isikke Kún sáýlesiniń áserinen shaldyǵýy múmkin. Dárigerlerdiń aldyn ala jasaǵan joramaly osyndaı.
Buqaralyq aqparat quraldary ánshiniń mı qaterli isigine shaldyqqany rastalǵanyn habarlady. Endi sarapshylar aty jaman aýrýǵa sebep bolǵan faktorlardy anyqtaýǵa tyrysyp jatyr. Neırohırýrg Andreı Grınge silteme jasaǵan Utro.ru-dyń habarlaýynsha, Frıskeniń júkti kezinde Meksıka men Maıamıde únemi kúnge qyzdyrynýy osyndaı dertke uryndyrýy múmkin. «Aýrýǵa kún radıatsııasy sebep bolýy yqtımal. Jyly elderge jıi baryp, rakqa shaldyqqan nemese joıylǵan isigi qaıta taralǵan patsıentter kóp boldy», - deıdi A.Grın. Ǵalymnyń aıtýynsha, keseldiń tándi jasartý operatsııalarynan paıda bolýy da ǵajap emes.
J.Frıske byltyr sáýir aıynda sábıli bolǵan edi. Balanyń ákesi - tanymal telejúrgizýshi Dmıtrıı Shepelev. 39 jastaǵy ánshiniń qaterli isikke shaldyqqany jaıly habar ótken aptada tarady. Aqparat quraldarynyń málimetinshe, onyń dıagnozy - mı isiginiń asqynǵan túri - glıoblastoma. Medıtsınalyq zertteýlerge qaraǵanda, bul dertten tolyq aıyqqan adamdar óte sırek. Aıta keteıik, qazaqstandyqtar arasynda Jannanyń ónerine tánti bolýshylar kóp. 2012 jyly ekibastuzdyq sýretshi Ǵamal Saǵıdenov onyń músinin jasap, Pavlodar qalasyna syıǵa tartqan edi, dep jazady alashainasy.kz.
