Perýlik shamandar jer betine beıbitshilik pen bereke tileýde
ASTANA. 1 qańtar. QazAqparat - Ár eldiń salty erekshe. Perýlik shamandar jer betinde beıbitshilik ornaýyn tilep jatyr. Bul izgi rásimdi olar árbir jańa jyldyń aldynda jasaýdy dástúrge aınaldyrǵan, dep jazady 24.kz.
Sonymen birge baqsylar keler jyly bolatyn oqıǵalardy boljap, ózderinshe bal ashty. Olardyń bul áreketteri «Atyń shyqpasa, jer órteniń» keri de bolar. Biraq elden erekshe qylyqtary kórgen jannyń kóńilin kóteretini daýsyz. Eń bastysy, olardyń nıetinen eli men jerin súıgen adaldyq anyq kózge uryp tur. Shamandar rásimderin Perý men Chılı prezıdentterin bále-jaladan alastaýdan bastady. Mundaǵy nıetteri - Perý men Chılı arasyndaǵy teńiz shekarasynyń daýy ońynan sheshilsin degen tilek. Eki eldiń prezıdentteri daý-damaıdan aýlaq bolsyn dep, sýmen alastady. Perý men Chılıdiń jer daýyna qatysty sheshimdi 27 qańtarda Gaagadaǵy Halyqaralyq sot qabyldaıdy. Al AQSh Prezıdenti Barak Obama baqsylardyń basty nazarynda tur. Olar 2014 jyly Amerıkada kóshi-qon reformasy júrip, syrttan keletin kirmelerge aq jol ashylady dep senedi. Sebebi aǵylǵan ımmıgranttardyń deni - perýlikter. Degenmen, Perý baqsylary barsha adamzattyń amandyǵyn, jer betinde beıbit ómir ornap, bereke darýyn tileıdi.
