Perýdiń burynǵy prezıdenti men onyń áıeli 15 jylǵa bas bostandyǵynan aıyryldy

ASTANA. KAZINFORM – Perý soty eki saılaý naýqanyn qarjylandyrý úshin brazılııalyq Odebrecht qurylys kompanııasy men Venesýela úkimetinen tólemderdi qabyldaǵany úshin burynǵy prezıdent Olıana Ýmala men áıeli Nadın Eredııany kináli dep tapty. 

VVS-diń habarlaýynsha, olar sybaılas jemqorlyq isi boıynsha 15 jylǵa bas bostandyǵynan aıyryldy. 

Ýmala úkim shyǵarylǵannan keıin sot zalynda qamaýǵa alyndy. Sýdıa sot otyrysyna qatyspaǵan onyń áıelin de qamaýǵa alýdy buıyrdy. Keıinirek onyń Lımadaǵy Brazılııa elshiliginen saıası baspana suraǵany belgili boldy. 

2011-2016 jyldary prezıdent qyzmetin atqarǵan Ýmala 2022 jyly Odebrecht tóńiregindegi iri jemqorlyq janjalyn tergeý aıasynda sot aldynda jaýap bergen Perýdiń alǵashqy basshysy boldy. Bıliktiń málimdeýinshe, buǵan sondaı-aq basqa burynǵy prezıdentterdiń de qatysy bar. 

1985-1990 jáne 2006-2011 jyldar aralyǵynda memleket basshysy bolǵan Alan Garsıa 2019 jyly polıtsııa ony tutqyndaýǵa kelgende óz-ózine qol jumsady.

Alehandro Toledo (2001-2006 jyldardaǵy prezıdent) ótken jyly mıllıondaǵan dollar para alǵany úshin 20 jyldan asa merzimge bas bostandyǵynan aıyrylǵan. 

Sondaı-aq bul qyzmetti 2016-2018 jyldary atqarǵan Pedro Pablo Kýchınskıge qatysty tergeý amaldary jalǵasyp jatyr. 

Buǵan deıin naýryz aıynda Perý prezıdenti jalpyhalyqtyq saılaý kúnin belgilegenin habarlaǵan edik.