Perýdiń jańa prezıdenti kóktemde qaıtadan saılaý ótkizýdi usyndy
LIMA. QazAqparat – Perýdiń jańa prezıdenti Dına Bolýarte 2024 jyldyń sáýirinde elde jalpy saılaý ótkizýdi usyndy jáne tıisti zań jobasyn respýblıka kongresine jiberetinin málimdedi, dep habarlaıdy QazAqparat Euronews-ke silteme jasap.
Sonymen qatar prezıdent jappaı narazylyq aktsııasy ótip jatqan aımaqtarda tótenshe jaǵdaı engizdi.
«Men jalpy saılaýdy 2024 jyldyń sáýirine aýystyrý týraly kongrespen kelisimge kelý boıynsha bastama kótereıin dep sheshtim. Áleýmettik qaqtyǵystar deńgeıi joǵary aýdandarda tótenshe jaǵdaı engizilgenin jarııalaımyn. Sondaı-aq halyqtyń negizgi quqyqtaryn shektemeı, ishki tártipti beıbit jolmen qalpyna keltirý úshin sharalar qabyldandy», - dedi Bolýarte halyqqa joldaǵan teleúndeýinde.
Andahýaılas – eń úlken narazylyq bolyp jatqan aýdandardyń biri. Munda 15 jáne 18 jastaǵy eki adam qaıtys bolǵany habarlandy.
Perýdiń baıyrǵy halyqtary aýyldyq kásipodaqtar men uıymdar seısenbide tutqyndalǵan Prezıdent Pedro Kastılony qoldaý úshin «merzimsiz ereýil» bastaýǵa shaqyrýda.
«Biz kommýnıst emespiz. Ekonomıkalyq turǵydan artta qalmas úshin sybaılas jemqorlyqsyz elde ómir súrgimiz keledi. Biz otarshyldyqtyń qysymynda qalǵymyz kelmeıdi», - deıdi narazylyq bildirýshilerdiń biri.
«Birinshiden, biz Prezıdent Pedro Kastılony bosatýdy talap etemiz, ekinshiden, bul shirigen jemqor kongress taratylýy kerek. Biz quryltaı jınalysyn shaqyrýdy talap etemiz. Úshinshiden, Perýde tótenshe jaǵdaı jarııalanýy kerek», - dep narazylyq aktsııasyna kelgen Perý turǵyny óz talaptaryn qoıdy.
Qaqtyǵystar kongresstiń ózinde el astanasy Lımada da boldy.
Burynǵy memleket basshysy Pedro Kastılonyń quqyqtyq jaǵdaıyn talqylaǵan plenarlyq otyrys eks-prezıdenttiń jaqtastary men qarsylastary arasyndaǵy tóbeleske baılanysty toqtatyldy.
Perýdegi saıası daǵdarys ótken aptanyń ortasynda bastaldy.
Burynǵy memleket basshysy Pedro Kastılo ımpıchment boıynsha daýys berýge jol bermes úshin kongresstiń taratylǵanyn jáne shuǵyl úkimet qurylǵanyn jarııalaǵan.
Bul tóńkeris áreketi retinde qabyldanyp, Kastılo qyzmetinen bosatyldy jáne qamaýǵa alynǵan edi.
Vıtse-prezıdent Dına Bolýarte parlamentte ant berip, Perýdiń alǵashqy áıel prezıdenti boldy.
Foto: www.trend.az
