Perýdiń eks-prezıdenti ózin-ózi óltirdi
NUR-SULTAN. QazAqparat - Perýdiń burynǵy prezıdenti (1985-1990, 2006-2011) Alan Garsııa sybaılas jemqorlyq isi boıynsha sot sheshimimen ustaý kezinde óz-ózine qol jumsap, Lıma aýrýhanasynda kóz jumdy, dep habarlady sársenbi kúni TeleSUR telearnasy.
Sot Garsııany on kúnge qamaý týraly sheshim shyǵarǵan. Prokýratýra qyzmetkerleri Lıma aýdandarynyń birindegi úıinde eks-prezıdentke order kórsetken kezde ol ózin-ózi óltirgen.
Ótken jyldyń qarashasynda sot Garsııanyń eldi 18 aıǵa deıin tastap shyǵýyna tyıym salǵan bolatyn.
Tergeýshilerdiń pikirinshe, saıasatker Odebrecht kompanııasyna tıimdi kelisimshart jasalýy úshin 100 myń dollar alǵan bolýy múmkin.
Burynǵy memleket basshysy óz kinásin moıyndaǵan joq.
2018 jyly 17 qarashadan 3 jeltoqsanǵa deıin ol Ýrýgvaı elshiliginde boı tasalap júrgen. Biraq oǵan pana berýden bas tartylǵannan keıin rezıdentsııadan ketýge týra keldi.
