Perýde tolassyz nóser jaýyp, 20-dan astam adam qaza tapty

ASTANA. KAZINFORM — Perýde tolassyz jaýǵan jańbyr men laı kóshkin 20-dan astam adamnyń ómirin qıdy. Tabıǵı apattan eldiń barlyq provıntsııasy zardap shekti, dep habarlaıdy BELTA.

Myńdaǵan turǵyn syrtqy álemmen baılanysyn úzip, jaryqsyz qaldy. Tas aralasqan tasqyn sý men laı kóshkinge adamdar aǵyp ketti. Evakýatsııaǵa úlgergender ózderimen birge kishkentaı úı janýarlary men birneshe zatyn ǵana ala aldy. Ondaǵan otbasy baspanasyz qaldy. Turǵyn úıler qoqys astynda qalyp, joldar qırady.

Qazir qutqarýshylar men turǵyndar úıindilerdi tazalap, úıler men kóshelerdi laıdan tazartyp jatyr. Elde barlyǵy 167 jol qırap, tasqyn sý 20 shaqyrym tas joldy tolyǵymen shaıyp ketti.

Chılıdiń astanasy Santıagoda da qatty jańbyr jaýyp, sý tasqynyna ulasty. Tabıǵı apat qalanyń birneshe aýdanynda kólik qozǵalysyn tolyǵymen toqtatty. Elektr jelilerin sý shaıyp, symdar úzilgennen keıin búkil aýdan jaryqsyz qaldy.

Eske sala keteıik, byltyr Indonezııada tabıǵı apat saldarynan 900-den astam adam mert boldy.