Perýde prezıdenttik saılaý ótedi

ASTANA. KAZINFORM – Perýde prezıdenttik jáne parlamenttik saılaý ótedi. Eldegi eń joǵary memlekettik laýazymǵa 35 kandıdat úmitker bolyp otyr. Bul týraly Reuters agenttigi habarlady.

Saılaý aldyndaǵy saýalnamalardyń nátıjesine sáıkes, úmitkerlerdiń eshqaısysy respondentterdiń 20 paıyzdan astam qoldaýyna ıe bola almaǵan. Eń tanymal kandıdat retinde konservatıvtik «Halyq kúshi» partııasynyń jetekshisi Keıko Fýhımorı atalady. Ol – 1990-2000 jyldary eldi basqarǵan burynǵy prezıdent Alberto Fýhımorıdiń qyzy. Keıko Fýhımorı buǵan deıin úsh ret saılaýdyń ekinshi kezeńine ótken, alaıda ár joly jeńilis tapqan.

Datum kompanııasynyń 1-4 sáýir aralyǵynda júrgizgen saýalnamasyna sáıkes, Fýhımorıden keıingi oryndarda ońshyl-ortalyq baǵyttaǵy «Barlyǵy úshin el» partııasynan úmitker retinde túsip jatqan komık Karlos Alvares pen Perý astanasynyń burynǵy meri Rafael Lopes Alıaga tur. Sońǵysy ońshyl baǵyttaǵy «Halyqtyq jańarý» partııasyn basqarady.

Birinshi kezeńde jeńiske jetý úshin kandıdat saılaýshylar daýysynyń jartysynan kóbin alýy tıis. Eger mundaı nátıje tirkelmese, 7 maýsymda Perýde saılaýdyń ekinshi kezeńi ótedi. Oǵan eń kóp daýys jınaǵan eki úmitker qatysady.

Aıta keteıik, buǵan deıin AQSh-ta 14 jastaǵy jasóspirim shtat gýbernatory saılaýyna úmitker atanǵanyn jazdyq. 

Al Prezıdent Qasym-Jomart Toqaev elimizdegi Quryltaı saılaýy tamyz aıynda ótetinin málimdedi.