Perýde magnıtýdasy 5,5 bolatyn jer silkinisinen bir adam qaza tapty
ASTANA. KAZINFORM – Perýde magnıtýdasy 5,5 bolatyn jer silkinisi saldarynan bir adam qaza taýyp, taǵy on adam jaraqat aldy. Jerasty dúmpýleri el astanasy Lımada jáne Ýankaıo qalasynda da sezildi, dep habarlaıdy Anadolu Ajansı.
AQSh Geologııalyq qyzmetiniń (USGS) málimetinshe, jer silkinisiniń epıtsentri Sıkaıa qalasynan ońtústik-batysqa qaraı eki shaqyrym jerde ornalasqan. Oshaq 10 shaqyrym tereńdikte tirkelgen.
Jergilikti buqaralyq aqparat quraldarynyń habarlaýynsha, qaza tapqan adam Hýnın óńiriniń Chongos-Baho aýdanynda tirkelgen. Taǵy on adam túrli jaraqat alǵan.
– Hýnın óńirinde medıtsınalyq mekemelerdiń biriniń ınfraqurylymy zaqymdandy. Sonymen qatar El-Karmen óńirlik ana men bala aýrýhanasynyń balalar jansaqtaý bóliminde jaryqtar paıda boldy, – dep habarlady basylym.
Ulttyq tótenshe jaǵdaılar komıtetiniń (COEN) málimetinshe, jer silkinisinen keıin zardap shekken birqatar aýdanda elektr energııasy ýaqytsha úzilgen.
Áleýmettik jelilerde Perý turǵyndary kúshti jer silkinisin sezingenderin jazdy. Qaýipsizdik maqsatynda turǵyndardyń bir bóligi turǵyn úıler men basqa da ǵımarattardan evakýatsııalandy.
Aıta keteıik, búgin Irannyń ońtústik-batysynda da 5 baldyq jer silkinisi boldy.
