Perýde eldiń eks-prezıdenti men onyń jubaıy qamaldy
ASTANA. QazAqparat - Perýde eldiń burynǵy prezıdenti Olıant Ýmala men onyń jubaıy Nadın Eredıı temir torǵa qamaldy. Sot qarjy jymqyrý jáne jemqorlyq isi boıynsha olardy qamaýǵa alý orderin berdi, dep habarlaıdy QazAqparat «Rosbalt»-qa silteme jasap.
Perýdiń burynǵy basshysy tergeý aıaqtalǵanǵa deıin 18 aı qamaýda bolady.
Tergeýshilerdiń deregi boıynsha, Ýmala memleket basshysy bolǵan kezde Venesýela men Brazılııadaǵy kompanııalardan aqsha alyp otyrǵan. Alǵan qarjyny ol saılaýaldy naýqan kezinde jumsaǵan. Kýágerlerdiń aıtýynsha, 2006 jyly prezıdenttiń otbasy Venesýela elshiliginen dollarǵa toly on kelilik eki qap alǵan.
Ýmala men onyń áıeli sot otyrysyna qatysqan joq. Alaıda, sot sheshimi jarııalanǵannan kóp uzamaı olar bılikke óz erikterimen berildi.
