Perýde eki jer silkinisinen alty adam qaza tapty
ASTANA. KAZINFORM – Perýdiń ortalyq bóligindegi taýly aımaqta bolǵan eki jer silkinisi saldarynan keminde alty adam qaza taýyp, taǵy 21 adam jaraqat aldy, dep habarlaıdy Reuters.
Eldiń Azamattyq qorǵanys qyzmeti basshysynyń málimetinshe, jer silkinisteri senbi kúni keshke Hýnın óńirindegi Chýpaka provıntsııasynda tirkelgen.
Perý Ulttyq seısmologııalyq ortalyǵynyń X áleýmettik jelisinde jarııalaǵan aqparatyna sáıkes, jer silkinisteriniń magnıtýdasy 5,1 jáne 3,7 bolǵan. Tabıǵı qubylys Lımadan shyǵysqa qaraı shamamen 300 shaqyrym jerde ornalasqan Chýpaka provıntsııasynda oryn aldy.
– Birinshi jer silkinisiniń oshaǵy 24 shaqyrym, al ekinshisiniki 18 shaqyrym tereńdikte ornalasqan, – delingen Ulttyq seısmologııalyq ortalyqtyń habarlamasynda.
Qazir óńirde zardap shekkenderge kómek kórsetý jáne jer silkinisiniń saldaryn joıý jumystary jalǵasyp jatyr.
Aıta keteıik, buǵan deıin Perýde magnıtýdasy 5,5 bolatyn jer silkinisi bolyp, bir adamnyń qaza tapqany habarlanǵan edi.
