Perýashev telefondardy buǵattaýǵa qatysty pikirin bildirdi
ASTANA. QazAqparat - QR Parlamenti Májilisiniń depýtaty Azat Perýashev IMEI-kodtardyń biryńǵaı bazasynda tirkelmegen telefondardy buǵattaýdy engizý máselesine qatysty pikirin aıtty, dep habarlaıdy QazAqparat.
«Bul jalpy álemdik úrdis. Kóptegen elderde qandaı da bir qurylǵynyń ıesi bolýy kerektigi baqylanady, sondaı-aq hat almasýlar da qajet jaǵdaıda tekseriledi. Ekstremızm men lańkestikke qarsy is-qımyl aıasynda bul úrdis turaqtanyp keledi. Al bizde naqty bir adamǵa tirkelmese telefondardy buǵattaý týraly sheshim jańadan engizilgen talap dep aıtýǵa kelmeıdi. Sebebi telefondar jeke kýálik arqyly rásimdelip, satylyp júrgenine birneshe jyl boldy»,-dedi Perýashev Májilistegi jalpy otyrystan keıin tilshiler saýalyna jaýap berý kezinde.
Osy oraıda depýtat bul baǵytta problemany baıqap turmaǵanyn atap ótti.
«Shyn máninde mobıldi qurylǵylardy adamdar jıi aýystyrady. Bul rette azamattar úshin osy qadamdar qandaı da bir saldaryn tıgizedi dep oılamaımyn. Ekinshi jaǵynan alyp qaraǵanda, biz memleketimizdiń qaýipsizdigin qamtamasyz etýge múddeli ekenimizdi jete túsinýimiz qajet. Sondyqtan da osyǵan baılanysty týyndaǵan barlyq kúdikterdi pysyqtaı otyryp, bul qadam ýaqyt talabyna saı jasalǵanyna mán berý qajet»,-dedi Perýashev.
Aıta keteıik, Qazaqstanda IMEI-kodtardyń biryńǵaı bazasynda tirkelmegen telefondardy buǵattaý sharalary bastalady. «Qazaqstan Respýblıkasynyń keıbir zańnamalyq aktilerine ekstremızm men terrorızmge qarsy is-qımyl máseleleri boıynsha ózgerister men tolyqtyrýlar engizý týraly» Zańda telefondardyń sáıkestendirý kodtaryn (IMEI) mindetti tirkeý normasy bekitilgen. Qazirgi kezde IMEI-kodtardyń biryńǵaı bazasyn qurý baǵytynda tıisti sharalar atqarylýda.
