Perýashev pen Sárinjipov arasyndaǵy daýǵa baılanysty fılologııalyq saraptama taǵaıyndaldy - IIM
ASTANA. QazAqparat - Depýtat Azat Perýashev pen mınıstr Aslan Sárinjipov arasyndaǵy daýǵa baılanysty fılologııalyq saraptama taǵaıyndaldy. Bul týraly búgin tilshilerge bergen suhbatynda QR Ishki ister mınıstri Qalmuhanbet Qasymov málim etti.
"Bizde qylmystyq is qozǵaldy. Olardan jaýap alyndy. Biz qazir fılologııalyq sot saraptamasyn taǵaıyndadyq, onyń nátıjesinde tıisti sheshim qabyldaımyz", - dedi mınıstr.
Esterińizge sala ketsek, 27 mamyr kúni Parlament Májilisiniń jalpy otyrysynda Azat Perýashev joǵary oqý oryndary men tehnıkalyq-kásiptik bilim berý uıymdarynyń akkredıtatsııaǵa ótýge qatysty Bilim jáne ǵylym mınıstrliginiń qyzmetin synǵa alǵan bolatyn. Depýtat ol kezde, "zańdardy ózgerte bergenshe, mınıstrdi aýystyrǵan jeńilirek bolady" degen edi. Keıin, mınıstr Aslan Sárinjipov BAQ ókilderine suhbat berip, Perýashevtiń jeke joǵary oqý oryndarynyń múddesin qorǵap jatqanyn aıtqan. Buǵan narazy bolǵan depýtat Májilis spıkerinen Bas prokýratýraǵa shaǵym túsirýin surady.
