Perýashev: Qazaqstanda tsıfrlyq aktıvter naryǵyn damytý qarqynyn arttyrý qajet
ASTANA.KAZINFORM - Qazaqstan krıptoındýstrııa men tsıfrlyq aktıvter naryǵyn damytý arqyly ekonomıkanyń naqty sektoryna qosymsha ınvestıtsııa tartý múmkindigin tıimdi paıdalaný kerek. Bul týraly Májilis depýtaty Azat Perýashev «Qazaqstan Respýblıkasyndaǵy krıptoındýstrııany damytý jáne ony retteý erekshelikteri» taqyrybyndaǵy jabyq formattaǵy dóńgelek ústelde aıtty.
Onyń aıtýynsha, Qazaqstan bir kezderi krıptonaryqtyń damýy jaǵynan kenje qalǵanymen, qazir bul baǵyttaǵy áleýetti iske asyrýǵa barlyq múmkindigi bar.
– Tsıfrlyq aktıvter bızneske qarajat tartýdyń jańa múmkindikterin usynyp, dástúrli qarjylandyrý kózderine táýeldilikti azaıta alady. Máselen, tabysy turaqty kásiporyndar óz aktıvterin tokenızatsııalaý arqyly ınvestorlardan qarajat tarta alady. Bul bank arqyly qarjy izdeýge qaraǵanda áldeqaıda jeńil ári bıýrokratııalyq kedergileri az jol bolar edi, - dedi depýtat.
Ol sondaı-aq steıblkoınder men aktıvterdi tokenızatsııalaý qarjy naryǵynyń jańa baǵytyna aınalyp kele jatqanyn aıtty. Mundaı quraldar qazirdiń ózinde jekelegen qarjy segmentterinde qoldanyla bastady.
– Tsıfrlyq qarjy quraldarynyń áleýeti óndiris, ónerkásip jáne ınfraqurylym sııaqty naqty sektorlardy damytýǵa, sondaı-aq ekonomıkaǵa jańa ınvestıtsııalar tartýǵa múmkindik beredi. Salanyń turaqty damýy úshin retteýshilik táýekelderdi tómendetip, memlekettik organdar, bıznes qaýymdastyq jáne krıptonaryq qatysýshylary arasyndaǵy tıimdi ózara is-qımyldy jolǵa qoıý qajet, - dedi Azat Perýashev.
Depýtat tsıfrlyq qarjy tehnologııalary men naqty sektor arasynda tıimdi baılanys ornatýdyń mańyzdylyǵyna da toqtaldy.
– Ekonomıkanyń naqty sektory men tsıfrlyq qarjy tehnologııalary arasynda kópir qalyptastyrý qajet. Bul sınergııalyq nátıje berip, eldiń ınvestıtsııalyq tartymdylyǵyn kúsheıtedi, – dedi ol.
Buǵan deıin Ulttyq bank tsıfrlyq aktıv operatorlaryn lıtsenzııalaý tártibin bekitken edi.
