Perýashev: Bıshimbaev isine sońǵy núkteni sot qoıady
ASTANA. QazAqparat - QR Parlamenti Májilisiniń depýtaty Azat Perýashev sybaılas jemqorlyq boıynsha aıyptalyp otyrǵan burynǵy Ulttyq ekonomıka mınıstri Qýandyq Bıshimbaevtyń qylmystyq isine qatysty pikirin aıtty, dep habarlaıdy QazAqparat.
«Osy joba boıynsha (Qyzylordadaǵy shyny zaýyty) aıtatyn bolsam, birneshe jyl buryn Murathan Toqmádı basshylyq etip otyrǵan shyny óndirýshiler qaýymdastyǵy tarapynan da qarsylyq bolǵan edi. Ol sol kezde ınvestor retinde tartylǵan kompanııa shyn máninde óziniń mindetine saı emestigin atap ótken bolatyn. Keıinnen bankrotqa ushyrady, keńselerinde tek qana segiz adam jumys istep júrgeni habarlanǵan. Qazir bul másele tolyq esimde emes, biraq tıisti hatty joldaǵan edik»,-dedi A. Perýashev.
«Eskerilgen shyǵystar sáıkes bolmady, ıaǵnı olardyń esebi boıynsha joba eshqashan da tıimdilik kórsetpeıtindigi aıtyldy. Osyndaı qarsylyq boldy, alaıda bul jobany qarjylandyrýǵa qadam jasady. Sonymen qatar qarjylandyrý quny tómen deńgeıdegi osy tektes basqa jobaǵa tosqaýyl jasaldy»,-dedi depýtat.
Onyń paıymynsha, bul máselede ádil emes básekelestikke jol berildi.
«Bıshimbaev myrzanyń naqty aıyptaýǵa qatysty onda kinásizdik prezýmptsııasyn eskerý kerek. Bul aıyptaýdy sybaılas jemqorlyqpen kúres jónindegi ókiletti organ jasady, al sońǵy núkteni sot qoıady»,-dep túıdi Perýashev.
Budan buryn habarlanǵandaı, Qýandyq Bıshimbaev zaýyt qurylysy kezinde mıllıard teńge jymqyrý qylmysynda kúdikke ilindi. Tergeý amaldary barysynda ol «Báıterek UBH» AQ basqarmasynyń tóraǵasy bolǵan kezde Qyzylorda qalasynda tabaq shyny shyǵaratyn jáne óńdeıtin zaýytty salý kezinde «Orda Glass» JShS vedomstvolyq baǵynystaǵy kompanııa men onyń merdigerlik uıymy «Shymkenthımmontaj» JShS arqyly 1 mlrd teńgeni jymqyrý qylmystyq shemasyn uıymdastyrǵan.
