Perýashev bıliktiń halyq aldyndaǵy jaýapkershiligi artatynyna senimdi
«Jalpy, bul úndeý bizdi qýantyp otyr. Biz ony qoldaımyz. Osyǵan oraı búgin tańerteń «Aq jol» partııasy ortalyq keńesi tóralqasynyń kezekten tys otyrysy ótti. Biz muny Qazaqstan saıası júıesiniń damýyndaǵy jańa tarıhı kezeńi dep sanaımyz. Ol bılikti halyqqa jaqyndatyp, túsinikti, ádil jáne jaýapkershiligin joǵary ete túsedi», - dedi ol BAQ ókilderine bergen suhbatynda.
Osy rette Azat Perýashev Úkimet músheleri keı kezde halyq qalaýlylarynyń kóptegen saýaldaryn elemeı jatatyndyǵyn atap ótti.
«Sizderge bir mysal keltire keteıin. Búginde depýtattardyń depýtattyq saýal joldaý ókilettigi bar. Mınıstrlerge saýal qoıǵan kezde olardyń jaýaptan jaltaryp ketken nemese durys jaýap bere almaǵan kezderi óte kóp boldy. Máselen, Indýstrııalandyrý baǵdarlamasy parametrlerin júıege asyrý boıynsha saýalnamama mınıstrlik maǵan ózim kórsetken tsıfrlardy qaıtalap berdi. Tek tórtinshisinde ǵana tolyq jaýap jiberdi», - dedi depýtat.
Onyń aıtýnysha, búginde Parlament pen Úkimet arasynda ózara is-qımyl jolǵa qoıylǵan.
«Qazirgi kúni depýtattar zań jobasyna túzetýler engizedi. Al mınıstrlik ókilderi otyryp alyp, olardyń zań jobasy tujyrymdamasynan tysqary ekendigin aıtady. Onda turǵan ne bar? Konstıtýtsııany oqyńyzdar! Konstıtýtsııaǵa sáıkes zań jobasyna depýtattardyń túzetýleri eger ol bıýdjettiń kirister bóliginiń qysqarýyna jáne shyǵystarynyń ulǵaıýyna qatysty bolǵan jaǵdaıda ǵana kelisilýi qajet. Bizdiń, partııamyzdyń túzetýleri Úkimet qorytyndysyna jıi jiberilgen edi. Al olardan teris qorytyndy keledi jáne sonyń negizinde bul túzetýlerdi jumys toby qabyldamaı tastaıdy», - dedi Perýashev.
Aıta keteıik, keshe QR Prezıdenti Nursultan Nazarbaev otandyq telearnalar arqyly bılik tarmaqtary arasynda ókilettikterdi bólý máseleleri jónindegi úndeýin jarııa etti. Onda Prezıdenttiń áleýmettik-ekonomıkalyq protsesterdi retteýdegi birshama ókiletterin Úkimetke jáne basqa da atqarýshy organdarǵa berý, Úkimetti jasaqtaýda Parlamenttiń rólin kúsheıtý qarastyrylǵan.
