Perý jaǵalaýynan 500 delfınniń óleksesi tabyldy
ASTANA. QazAqparat - Perýdiń soltústik jaǵalaýyndaǵy jaǵajaılarda sońǵy apta ishinde shamamen 500 delfınniń óleksesi tabyldy. Bul týraly sheteldik BAQ habarlaýda.
Ońtústikamerıkalyq eldiń teńiz ınstıtýty aqparatyna qaraǵanda, delfınderdiń jappaı qyrylýyna baılanysty arnaıy ǵylymı ekspedıtsııa uıymdastyryldy. Olardyń mindeti oryn alyp otyrǵan ahýaldy barynsha zerdelep, delfınderdiń neden ólgendigin anyqtaý bolyp otyr.
Perýlik balyqshylardyń aıtýynsha, delfınderdiń biraz bóligi aýǵa oratylyp qalǵan jerinen tabylǵan. Bul jaıt ta sútqorektilerdiń ólimine basty sebep bolýda. Degenmen, ǵalymdardyń paıymynsha, delfınder teńizde syrtqy faktorlardyń áserinen qyrylǵan.
Qazirgi ýaqytta eldiń tabıǵat qorǵaý qyzmetteri sútqorektilerdiń ólimine sý baldyrlarynan ýlaný sebep bolýy múmkin degen paıymdy da alǵa tartýda.
