Perý bıligi Meksıkamen dıplomatııalyq qarym-qatynasyn úzgenin jarııalady

ASTANA.KAZINFORM - Perý Úkimeti Meksıkamen dıplomatııalyq qarym-qatynasyn toqtatý týraly sheshim qabyldady. Óıtkeni buǵan deıin kóterilis uıymdastyrdy dep aıyptalǵan Ońtústik Amerıka Respýblıkasynyń burynǵy premer-mınıstri Betsı Chaves onyń Lımadaǵy elshiliginen pana tapqan, dep habarlaıdy TASS.

— Biz eks-prezıdent Pedro Kastılo jasaýǵa tyrysqan memlekettik tóńkeristiń seriktesi bolýy múmkin dep aıyptalǵan eks-premer Betsı Chavestiń Meksıkanyń Perýdegi elshiliginen baspana alǵanyn asa ókinishpen qabyldadyq. Bul dostyq áreket emes, sony eskere otyryp jáne Meksıkanyń qazirgi jáne burynǵy prezıdentteriniń eldiń ishki isterine birneshe ret aralasýyn eskere otyryp, Perý úkimeti Meksıkamen dıplomatııalyq qarym-qatynasty úzý týraly sheshim qabyldady, - dedi Perý syrtqy ister mınıstri Ýgo de Sela baspasóz máslıhatynda.

Ol sondaı-aq Perý bıligi Meksıkadaǵy azamattaryna konsýldyq qyzmet kórsetý jalǵasa beretinin naqtylady. Lıma ázirge Chavestiń mártebesi týraly Mehıko qalasynan eshqandaı habarlama alǵan joq.

2022 jyldyń 7 jeltoqsanynda Perýdiń sol kezdegi prezıdenti Kastılo Kongresti (bir palataly parlament) taratyp, komendanttyq saǵat engizetinin jarııalady. Ol bul málimdemesin sybaılas jemqorlyq aıyptaýlary boıynsha ımpıchment jarııalaýdy qarastyryp jatqan parlament sessııasy bastalmas buryn jasady. Parlament músheleri daýys berýdi toqtatpady jáne prezıdentti qyzmetinen bosatýdy maquldady. Qarýly kúshter men polıtsııa da kongresti qoldady.

Kastılo kóterilis uıymdastyrdy degen aıyppen qamaýǵa alyndy. Sol kezdegi premer-mınıstr Chaves te bul iske qatysy bar dep tanyldy. 2025 jyldyń qyrkúıeginde sot oǵan sot protsesiniń nátıjesin bostandyqta kútýge ruqsat berdi.

Buǵan deıin Perý bıliginiń narazylyq sharalary aıasynda tótenshe jaǵdaı jarııalaýǵa sheshim qabyldaǵanyn habarlaǵan edik.