Perý aıaqdopshysy Hesýs Rabanal «Qaıratta» óner kórsetetin boldy
ALMATY. 11 aqpan. QazAqparat - Almaty qalasynyń «Qaırat» fýtbol klýby Hesýs Rabanalmen úsh jyldyq kelisimshart jasady.
1984 jyly 25 jeltoqsanda Lıma qalasynda ómirge kelgen Hesýs Rabanal 2004 jyldan beri óziniń týǵan qalasyndaǵy «Ýnıversıtarıo» komandasynda óner kórsetip kelgen bolatyn. Sol qaptaldaǵy qorǵaýshy sondaı-aq, Perý ulttyq quramasy sapynda 7 oıynǵa qatysty.
Sońǵy matchyn 9 aqpanda ulttyq chempıonattyń 29-shy týrynda Lımanyń taǵy bir komandasy «AELÝ»-men ótkizgen «Ýnıversıtarıo» 1:0 esebimen jeńiske jetken bolatyn.
Almatylyqtardyń bas bapkeri Vladımır Vaısstyń aıtýynsha, H.Rabanal komanda sapyna Ispanııanyń Valensııa qalasynda 14 aqpanda bastalatyn oqý-jattyǵý jıynynda qosylmaq.
