«Perý arýy» baıqaýynyń fınalyna salmaǵy 95 keli boıjetken ótti
ASTANA. QazAqparat - Salmaǵy 95 kg bolatyn Mırella Pas Beılon «Perý arýy» baıqaýynyń fınalyna shyqty. Ol jeńimpazdy tańdaý kezeńine ótken baıqaý tarıhynda plus-size formatty dene bitimimen alǵashqy áıel boldy.
Bul týraly The Daily Mail habarlady. 19 jastaǵy Mırella tájge talasýǵa múmkindik alǵan on perýliktiń biri boldy. Olar 30 boıjetkenniń ishinen irikteldi.
«Rahmet. Bul múmkindik men úshin neni bildiretinin sózben aıtyp jetkize almaımyn», - dep ol fınalǵa ótken úshin ádilqazylar músheleri men kórermenderge alǵys bildirdi.
Bastapqyda Pas Beılon 115 keli bolǵan, jarys aldynda 20 keli tastaǵan. Ol úshin úsh aıyn sarp etken. Mırellanyń fınalǵa deıin taǵy da aryqtaıtynyna úmiti bar. Sebebi dıeta ustap, sportpen shuǵyldanýda.
lenta.ru habarlaǵandaı, boıjetken ýnıversıtette sáýletshi mamandyǵyna bilim alýda. Ol kýrstastary artynan semizdigin alǵa tartyp keleke qylatynyn da jasyrmady.
«Perý arýy» sáýir sońynda anyqtalady (naqty kúni belgisiz). Jeńimpaz «Álem arýy» baıqaýyna eli atynan óner kórsetetin bolady.
