Perseıdter meteor aǵyny 13 tamyzǵa qaraǵan túni sharyqtaý shegine jetedi
ASTANA. KAZINFORM – Perseıdter meteor aǵynynyń belsendiligi 13 tamyzǵa qaraǵan túni sharyqtaý shegine jetip, aspanda aq tústi meteorlar baıqalady, dep habarlaıdy TASS.
Máskeý planetarııiniń baspasóz qyzmetiniń málimetinshe, Perseıdter túngi aspandy jyldam kesip ótetin ashyq aq tústi meteorlarymen erekshelenedi. Olardyń eń jaryqtarynyń sáýlesi birneshe sekýnd boıy saqtalýy múmkin. Mundaı erekshe jaryq meteorlar bolıdter dep atalady.
Meteor aǵynyndaǵy bólshekterdiń qozǵalys jyldamdyǵy sekýndyna shamamen 60 shaqyrymǵa jetedi. Perseıdter Jer 109P/Svıft – Týttl kometasy qaldyrǵan shań-tozań bólshekteriniń shleıfi arqyly ótken kezde paıda bolady.
Kometa Kúndi shamamen 134 jylda bir ret aınalyp shyǵady. Kelesi joly ol Jerge 2126 jylǵy 12 shildede jaqyndaıdy.
Jyl saıyn tamyz aıynda Jer osy kometa qaldyrǵan ǵaryshtyq shań men muz bólshekteriniń bulty arqyly ótedi. Qum túıirshigindeı usaq bólshekter atmosferada janyp, aspanda jarqyraǵan iz qaldyrady. Halyq arasynda bul qubylys «aqqan juldyz» dep atalady.
Meteor aǵynynyń eń belsendi kezeńi tamyz aıyndaǵy túnderge sáıkes keledi, sodan keıin onyń qarqyndylyǵy birtindep tómendeıdi.
Aıta keteıik, buǵan deıin Soltústik jarty sharda, onyń ishinde Qazaqstanda da Perseıdterdi anyq kórýge bolatyny habarlanǵan.
