Perplexity Google Chrome braýzerin 34,5 mlrd dollarǵa satyp alýǵa daıyn

ASTANA. KAZINFORM — Perplexity jasandy ıntellekt kompanııasy Google Chrome braýzerin 34,5 mıllıard dollarǵa satyp alýǵa daıyn ekenin málimdedi, dep habarlaıdy The Wall Street Journal.

Basylym Perplexity 18 mıllıard dollarǵa baǵalanǵanyn habarlaıdy. Kompanııa birneshe ınvestorlardyń qoldaý kórsetýge keliskenin aıtty.

2024 jyldyń kúzinde AQSh-tyń Ádilet mınıstrligi Google-di monopolıst dep jarııalap, onyń taratylýy múmkin ekenin aıtty. 

Bloomberg keıinirek Ádilet mınıstrligi monopolııaǵa qarsy istiń bir bóligi retinde Chrome braýzerin satýdy talap etýi múmkin ekenin habarlady.

Yahoo da braýzerdi satyp alýǵa qyzyǵýshylyq tanytty. Kompanııa ókilderi bul úshin ondaǵan mıllıard dollar tóleýge daıyn ekenin aıtty. Sondaı-aq OpenAI Chrome braýzerin satyp alýǵa qyzyǵýshylyq tanytady.

Chrome braýzerin dúnıe júzinde shamamen 3,5 mıllıard adam paıdalanady, bul álemdik braýzer naryǵynyń 60 paıyzyn quraıdy.

Eske sala keteıik, Germanııada 16 jasqa deıingi balalarǵa TikTok pen Instagram-ǵa tyıym salý usynyldy.