Perm qalasyndaǵy túngi klýbta oryn alǵan qaıǵyly jaǵdaı kez-kelgenimizge sabaq bolýy tıis - M.Demeýov
sp;ASTANA. Jeltoqsannyń 8-i. QazAqparat /Marlan Jıembaı/ - Búgin Astana qalalyq ІІD bastyǵy Marat Demeýov pen Tótenshe jaǵdaılar jónindegi departament bastyǵy Jumabaı Іskendirovtyń qatysýymen jedel jıyn ótti,
dep habarlaıdy QazAqparat.
Jıynǵa qalalyq ishki ister departamentiniń jeke quramy, ýchaskelik ınspektorlar, kámelettik jasqa tolmaǵandar isimen aınalysatyn ınspektorlar, tabıǵatty qorǵaý jáne mal dárigerlik bólimi, lıtsenzııalyq ruqsat berý bólimi, sonymen qatar Tótenshe jaǵdaılar jónindegi departamenttiń qyzmetkerleri qatysty.
«Jańa jyldy qarsy alýǵa da az ýaqyt qaldy. Jas Astananyń sulýlyǵyna súısinip, jańa jyldy qalamyzda qarsy alýǵa nıet bildirgender sany kún saıyn kóbeıip keledi. Jer- jerden aǵylǵan qala qonaqtarynyń jaqsy dem alýyna barynsha jaǵdaı jasalýy qajet. Árıne, bizdiń basty maqsatymyz - qoǵamdyq qaýipsizdikti saqtaý. Jýyrda Reseıdiń Perm qalasynda «Aqsaq at» túngi klýbynda oryn alǵan qaıǵyly jaǵdaı, kez kelgenimizge sabaq bolýy kerek. Oqıǵa órt qaýipsizdigi saldarynan oryn alyp otyr. Apat aıtyp kelmeıtindigin bilesizder», dedi Marat Demeýov.
ІІD bastyǵy sonymen qatar arnaıy jedel shtab qurylǵandyǵyn atap ótti. Quramynda ýchaskelik ınspektor, lıtsenzııalyq ruqsat berý, Tabıǵatty qorǵaý jáne Tótenshe jaǵdaılar jónindegi departament qyzmetkerleri kirgen toptyń ázirge 10-y qurylǵan. Kún saıyn top quramyndaǵylar qala bazarlary, saýda úılerinde satylatyn pırotehnıkalyq jarylǵysh zattarǵa ruqsat berý júıesin, olardyń sapasy men saqtaý merzimin tekseredi. Al kóńil-kóterý oryndary, qaladaǵy joǵary, orta arnaıy bilim berý oryndary men mektep, balabaqshalardyǵy jańajyldyq shyrsha kúnin toılaý merekesin ótkizýdegi órt qaýipsizdiginiń aldyn-alý sharalaryn túsindiredi.
Kúni keshe elordadaǵy «Ajar» saýda úıinde polıtsııa qyzmetkerleri ruqsat qaǵazynsyz pırotehnıkalyq zattardy saýdalap turǵan kelinshekti anyqtady. Odan úlken tórt qorap atylǵysh zattar tárkilendi. Qazirgi ýaqytta osy azamatshanyń ústinen QR Ákimshilik quqyq buzýshylyq kodeksiniń 162 baby boıynsha ákimshilik hattama toltyryldy. Oǵan 20-dan 25-ke deıingi aılyq eseptik kórsetish kóleminde aıyppul salynady.
Polıtsııa qyzmetkerleriniń aıtýynsha, qalada bes zańdy tulǵanyń pırotehnıkalyq zattardy saýdalaýǵa ruqsaty bar, al qalǵan núktelerdegi saýdany zańsyz dep aıtýǵa bolady. Sonymen qatar qalaǵa kireberis beketterde de qadaǵalaý kúsheıtilip, jol polıtsııasy basqarmasynyń qyzmetkerleri kólikterdi tekserý jumystaryn júrgizýde.
