Perm qalasynda bal arasyna arnalǵan eń úlken eskertkish ornatylmaq
ASTANA. QazAqparat - Reseıdiń Perm qalasynda aldaǵy kóktemde bal arasyna arnap monetamen árlengen tórt metrlik eskertkish ornatylady. Bul týraly bal jáne bal sharýashylyǵy ónimderin shyǵaratyn holdıngten habarlady, dep jazady TASS.
«Qanatyn qomdaǵan bal arasy eskertkishiniń bıiktigi 2,5 m, tuǵyry 1,5 metr bolady», - dedi holdıng baspasóz qyzmetiniń basshysy Aleksandr Erenko. «Músindi jasaý úshin 250 keli keńestik monetany jınaýǵa týra keldi. Monetalardy eldiń ár túpkirinen jiberdi», - dedi ol. Eńbekqor jándikke eskertkishti permdik músinshi Rýstam Isamgılov somdaýda. Bal arasynyń eskertkishteri Máskeýde, Japonııada, Polsha, AQSh-ta bar.
