Permdegi túngi klýbta bolǵan oqıǵa bizde qaıtalanbaýy tıis -TJM ókili
ASTANA. Jeltoqsannyń 24-i. QazAqparat /Marlan Jıembaı/ - Búgin Tótenshe jaǵdaılar mınıstrliginde jańajyldyq is-sharalar barysynda órt qaýipsizdigin jáne pırotehnıkalyq zattardy paıdalaný erejesin saqtaý máselelerine arnalǵan baspasóz máslıhaty ótti.
Atalǵan mınıstrlik mamandarynyń aıtýynsha, qabyldanǵan sharalarǵa qaramastan Jańa jyl merekesi tótenshe jaǵdaılarsyz ótpeıtin bolyp otyr. Máselen, 2008-2009 jyldary pırotehnıkalyq zattardy durys paıdalanbaǵandyqtan 9 órt oqıǵasy bolǵan. Sonyń saldarynan 1998 jyly týylǵan bala betin kúıdirse, Almaty qalasynyń Túrksib aýdanynda aýmaǵy 70 sharshy metrdi quraıtyn sharýashylyq saraıy órt qushaǵyna oranǵan. Atalǵan tótenshe jaǵdaılardyń barlyǵy pırotehnıkalyq zattardy durys qoldanbaýdyń kesirinen oryn alǵan.
«Halyq arasynda qarapaıym petardylar, otshashýlar basqa da jarylǵysh zattar óte kóp qoldanylady. Degenmen, bul zattardyń da ózindik qaýipi bar. Olardy aıaqtyń astyna tastaýǵa, adamdarǵa baǵyttaýǵa bolmaıdy», deıdi Órtke qarsy qyzmet komıtetiniń bas mamany Serjan Nurǵazın.
Onyń aıtýynsha, pırotehnıkalyq zattardy bólmede, jyldamdyǵy sekýndyna 5 metrden asatyn jelde paıdalanýǵa, jarylǵysh zatty bólshekteýge jáne qaıta jınaýǵa, dymqyldanǵan pırotehnıkalyq zattardy jylytý aspaptarynda keptirýge, paıdalanǵannan keıin 2 mınýtqa deıin oǵan jaqyndaýǵa, ony paıdalaný barysynda jarylǵysh zattyń ústine eńkeıýge múldem tyıym salynady.
«Atalǵan talaptardy buzý zor qaıǵymen aıaqtalýy múmkin. Esterińizde bolsa, taıaýda Permdegi túngi klýbta bolǵan órttiń saldarynan 150 adam qaza taýyp, 78 adam aýyr zardap shekken bolatyn. Bul qaıǵyly jaıttyń shyǵýyna túngi klýb qojaıyndarynyń pırotehnıkalyq zattardy paıdalanýda órt qaýipsizdigi erejelerine uqypsyz qaraýy sebep boldy», dedi óz sózinde S.Nurǵazın.
