Perızattyń anasy qaıda qaraǵan — Jábirlenýshiler Ǵ. Alashbaevanyń jazasyn jeńildetýge qarsy shyqty

ASTANA. KAZINFORM — Astana sotynda «Birgemiz» qaıyrymdylyq qorynyń burynǵy jetekshisi, volonter Perızat Qaırat pen onyń anasy Ǵaını Alashbaevaǵa qatysty sot otyrysy jalǵasyp jatyr. Búgin qor esepshotyna aqsha aýdaryp, qarjylaı zardap shekkenderdiń pikiri tyńdaldy.

Eń aldymen «Forte Bank» AQ marketıng jónindegi dırektory Anton Kım jeke qarajatynan Birgemiz qoryna 500 myń teńge aýdarǵanyn, bul is boıynsha berilgen azamattyq talapty tolyq qoldaıtynyn jetkizdi.

— Biz azamattardyń ál-aýqatyn arttyrý, ekonomıkany damytý, zorlyq-zombylyqty joıýǵa baǵyttalǵan reformalar týraly jıi aıtamyz. Alaıda árbir osyndaı oqıǵa qoǵamnyń kóptegen oń jetistikterin joqqa shyǵaryp otyrady. Bizdiń polıtsııa, dárigerler men muǵalimder — senim artýǵa bolatyn tulǵalar dep senýimiz mańyzdy. Al «Birgemiz» qoryna qatysty jaǵdaı tutas qaıyrymdylyq salasyna degen senimge selkeý túsirdi. Buǵan deıin qaıyrymdylyq jasaǵan nemese ony josparlaǵan ár adam endi kúmánmen qaraıtyn boldy, — dedi ol sotta sóılegen sózinde.

Sonymen birge Anton Kım sottan Ǵaını Alashbaevanyń densaýlyǵyn eskerip, oǵan taǵaıyndalatyn jazany jeńildetýdi surady.

— Men P. Qaırat pen Ǵ. Alashbaevanyń kinási tolyq dáleldendi dep esepteımin. Azamattyq talabymdy tolyq qanaǵattandyrýdy suraımyn jáne jazaǵa qatysty prokýrordyń ustanymyn qoldaımyn. Degenmen Alashbaeva hanymnyń jasy men densaýlyq jaǵdaıyn eskerip, jeńildetetin mán-jaı retinde nazarǵa alýdy suraımyn, — deıdi A. Kım.

Degenmen ózge jábirlenýshiler Ǵ. Alashbaevaǵa esh jeńildik jasamaýdy surap otyr.

— Menińshe, eń qatań túrde jazalaý kerek. Anasynyń jazasyn jeńildetýdi surap otyr, anasy qaıda qaraǵan? Qyzyn toqtatýy kerek edi. Mıllıardtap urlyq jasaýǵa qalaı jol bergen, — dedi jábirlenýshi Ámına Aımaǵanbetova.

Taǵy bir jábirlenýshi R. Tomashev bul pikirdi qoldady.

— Qor týraly men tek ekonomıkalyq tergeý qyzmetinen estidim. Sondyqtan aıyptaý tarapyn tolyq qoldaımyn, shyǵarylǵan sheshimmen kelisemin. Kóptegen jábirlenýshiler (Ǵ. Alashbaevanyń — red.) jasyna, densaýlyǵyna baılanysty jazasyn jeńildetýdi surap jatyr.

Meniń oıymsha, mundaı jaǵdaılardy túbegeıli toqtatý kerek. Sondyqtan sheshimdi ózgerissiz qaldyryp, jasyn nemese aýrýyn syltaýratpaǵan jón. Azamattyq talabymdy qanaǵattandyrýdy suraımyn, — dedi jábirlenýshi Rýslan Tomashev. 

Buǵan deıin prokýrorlar Perızat Qaıratqa — 10 jyl bas bostandyǵynan aıyrý, Ǵanı Alashbaevaǵa 8 jyl bas bostandyǵynan aıyrý jazasyn suraǵan edi.

Eske sala ketsek, Perızat Qaırat daıyn dıplom satyp alǵysy kelgen áreketi týraly jazǵan edik. 

Sondaı-aq kýáger Perızat Qaırat qor qarjysyn qalaı qolma-qol aqshaǵa aýdarǵanyn aıtyp berdi. 

Sot barysynda áıgili ánshi, otandasymyz Dımash Qudaıbergenniń esimi ataldy.

Belgili bolǵandaı tasqyn kezinde Nazarbaev zııatkerlik mektebiniń qyzmetkerleri 2,9 mln teńge joldaǵan. 

Іsti qaraý kezinde Perızat Qaırat jetekshilik etken qorǵa qarjy aýdarǵan 47 adam jábirlenýshi dep tanyldy.