Perızat Qaırattyń sotynda Dımash Qudaıbergenniń esimi ataldy
ASTANA. KAZINFORM – Astanada qaıyrymdylyq qorynyń burynǵy jetekshisi, volonter Perızat Qaırat pen onyń anasy Ǵaını Alashbaevaǵa qatysty sot otyrysynda kýágerlerden jaýap alý protsesi jalǵasyp jatyr.
Qylmystyq istiń kezekti epızodymen tanystyrý barysynda álemge áıgili ánshi, otandasymyz Dımash Qudaıbergenniń esimi ataldy.
Memlekettik aıyptaýshy Arman Kızıkenniń málimdeýinshe, kúdikti Perızat Qaırat Dımash Qudaıbergenniń qatysýmen ótetin festıvalge 10 mıllıon teńge kóleminde qoldaý usynǵan.
- «Skıf Treıd» JShS-niń ókili Maksım Abdýrazakovtyń kýá bolý jaıtyna súıensek, aıyptalýshy ony erekshe qajettiligi bar balalardy qoldaýǵa arnalǵan festıvalge shaqyryp, qarjylaı kómek kórsetýdi usynǵan. Áńgime 10 mıllıon teńge jaıynda bolǵan jáne is-sharanyń hedlaıneri retinde Dımash Qudaıbergen bolatyny habarlanǵan, - dep oqydy kezekti epızodty Arman Kızıken.
Eskeretin jaıt, jábirlenýshiniń ózi sotqa kele almaýyna baılanysty, onyń kýá retindegi jaýaby aıyptaý tarapynyń bastamasymen jarııalandy.
Belgili bolǵandaı, tasqyn kezinde Nazarbaev zııatkerlik mektebiniń qyzmetkerleri 2,9 mln teńge joldaǵan.
Іsti qaraý kezinde Perızat Qaırat jetekshilik etken qorǵa qarjy aýdarǵan 47 adam jábirlenýshi dep tanyldy.
Buǵan deıin kúdikti Perızat Qaırat basqarǵan qaıyrymdylyq qoryna Nazarbaev mektebininiń ata-analary shamamen 1 mln teńge jınap bergeni týraly jazǵan bolatynbyz.
Odan bólek Perızat Qaırat jetekshilik etken qorǵa taǵy bir qurylys kompanııasy qorǵa 200 mln teńge aýdarǵan.
Keshe ótken sot otyrysynda Forte Bank marketıng dırektory Anton Kım tasqyn kezinde Perızat Qaırattyń qoryna jeke shotymnan jarty mıllıon teńge aýdarǵanyn aıtqan edi.
Sot otyrysynda belgili bolǵandaı, Perızat Qaırat anasyn ortaǵa salyp, 23 mln teńgege gúl bıznesin satyp alǵan.
Sonymen qatar «Asar-Úme» qorynyń prezıdenti Ashat Nurmashev kúdikti Perızat Qaıratqa 200 mln teńge aýdarǵanyn aıtty.
Sondaı-aq tanymal bloger Oljas Sadyq sotta kýálik etý barysynda Perızat Qaıratqa 83,5 mln teńgege aldanǵanyn aıtty.
Aıta ketsek, Úkimet basshysy Oljas Bektenov Perızat Qaırattyń ústinen qozǵalǵan iske qatysty pikir bildirdi.