Perızat Qaırattyń sotyn tikeleı efırden kórsetý máselesin qarastyrýǵa daıynbyz — Joǵarǵy sot

ASTANA. KAZINFORM — Joǵarǵy sot Kazinform saýalyna joldaǵan jaýapta «Biz birgemiz» qaıyrymdylyq qory arqyly anasymen birge qomaqty qarajat jymqyrdy» dep kúdikke ilingen Perızat Qaırattyń sotyn qandaı jaǵdaıda tikeleı efırden kórsetý arqyly ashyq júrgizetinderin aıtty.

— «Biz birgemiz» qaıyrymdylyq qorynyń negizin qalaýshylardyń biri — Perızat Qaırattyń isteri sotqa túspegen. Perızat Kaırattyń sońǵy qylmystyq isi sotqa kelip túsken jaǵdaıda, qoǵam tarapynan, zańgerler qaýymynan sondaı suranys bolsa, sot otyrystaryn tikeleı efırde kórsetý máselesi qarastyrylýy múmkin, — dep jazylǵan resmı jaýapta.

Eske salsaq, Qarjylyq monıtorıng agenttigi Perızat Qaırat pen onyń anasy Gaını Alashbaevaǵa qatysty tergep-tekserýdi aıaqtaǵan bolatyn. 19 naýryzda taraptar 109 tomnan turatyn qylmystyq is materıaldarymen tanysýǵa kirisken. 

Al agenttik tóraǵasynyń orynbasary Jeńis Elemesov osy is boıynsha sot qashan bastalatynyn aıtqan. 

— Kúdiktilerdi is materıaldarymen tanystyrý 9 maýsymda bitkennen keıin zań boıynsha úsh kún beriledi. 10 kúnniń ishinde prokýratýra isti sotqa jibergennen keıin sot qabyldap, qaı kúni bastalatynyn aıtady, — degen edi agenttik ókili.