Perızat Qaırattyń soty ishinara jabyq ótedi
ASTANA. KAZINFORM – Elorda soty eriktiler qozǵalysynyń belsendisi jáne qoǵamdyq qaıyrymdylyq qorynyń quryltaıshysy Perızat Qaırattyń ústinen qozǵalǵan qylmystyq is boıynsha sot otyrysyn ótkizý formatyna qatysty sheshim qabyldady.
Sottyń ishinara jabyq ótetini týraly sheshimmen Astana qalasynyń qylmystyq ister jónindegi aýdanaralyq sotynyń sýdıasy Sabyrjan Kárimov tanystyrdy.
– 2025 jylǵy 14 shilde kúni saǵat 10:00-de basty sot talqylaýyn jalpy tártippen, ashyq sot otyrysy taǵaıyndaldy. Aıyptalýshylardan jaýap alý kezinde, sot talqylaýy barysynda túsinikteme berý kezinde, sondaı-aq qupııa málimetter men bank qupııasyn quraıtyn materıaldar qarastyrylǵan kezde sot talqylaýynyń jarııalylyǵy shekteledi. Sot isin júrgizý tili – orys tili. Aıyptalýshyǵa qatysty bultartpaý sharasy, tergeý kezeńine deıin qamaýda ustaý sanktsııasy saqtalady, - dedi Sabyrjan Kárimov.
Buǵan deıin elordada Perızat Qaırattyń isine qatysty aldyn ala sot otyrysy ótkenin habarlaǵan edik.
Aıta ketsek, bıyl 30 maýsymda Perızat Qaırattyń isi sotqa jiberildi.
Eske salaıyq, eriktiler qozǵalysynyń belsendisi jáne qoǵamdyq qaıyrymdylyq qorynyń quryltaıshysy Perızat Qaıratqa qatysty tergeý júrgizilip jatqany 2024 jyly 14 qarashada belgili boldy.
Sondaı-aq Joǵarǵy sot Perızat Qaırattyń sotyn tikeleı efırden kórsetý máselesin qarastyrýǵa daıyn ekenin habarlady.