Perızat Qaırattyń soty nelikten ishinara jabyq ótedi – sýdıa jaýaby

ASTANA. KAZINFORM – Astana qalasynyń qylmystyq ister jónindegi aýdanaralyq sotynyń sýdıasy Sabyrjan Kárimov Perızat Qaıratqa qatysty sot otyrysynyń ishinara jabyq ótý sebebin zań tilimen túsindirdi.

- Bank qupııasy sanalatyn málimettiń saqtalýyn qamtamasyz etýdi eskere otyryp, sot aıyptalýshylardan jaýap alý kezinde, ıaǵnı túsinikteme berýi barysynda, qupııa aqparat bolýy múmkin málimetter aıtylsa, sondaı-aq qylmystyq is materıaldaryn zertteý kezinde, bank qupııasy sanalatyn derekter bolýy múmkin jaǵdaıda, sot talqylaýynyń jarııalylyǵyn shekteý týraly sheshim qabyldandy, - dedi Sabyrjan Kárimov.

Sýdıanyń málimdeýinshe, qalǵan jaǵdaıda sot otyrysy ashyq rejımde ótedi.

- Al Qazaqstannyń Izraıl jáne Palestınamen halyqaralyq qarym-qatynasqa áser etýi múmkin jaǵdaı týraly ótinishke kelsek, taǵylǵan aıypta qaqtyǵys jaǵdaıy kórsetilmegen, ıaǵnı aıyptalýshy Perızat Qaıratqa taǵylǵan aıyppen baılanysty emes. Sot isti tek taǵylǵan aıyp sheńberinde qaraıdy. Osylaısha, sot talqylaýynyń jarııalylyǵy tek zańmen qorǵalatyn múddeni saqtaý qajettiligi sheginde ǵana ustalady, al qalǵan jaǵdaıda jarııalylyq qaǵıdaty saqtalady. Qylmystyq isti qaraý barysynda barlyq qatysýshy men basqa da tulǵalar atalǵan qaǵıdatqa baǵynýy tıis. Osyǵan baılanysty aldyn ala tyńdaý jabyq dep jarııalandy. Qylmystyq is kóleminiń aýqymdylyǵyn eskere otyryp, sot qatysýshylary úshin keste jasaý qajet, - dep túsindirdi sýdıa.

Sot otyrysy apta saıyn dúısenbi jáne seısenbi kúnderi saǵat 10:00-de ótedi.

Belgili bolǵandaı Perızat Qaırattyń soty ishinara jabyq ótetin boldy.

Buǵan deıin elordada Perızat Qaırattyń isine qatysty aldyn ala sot otyrysy ótkenin habarlaǵan edik.

Aıta ketsek, bıyl 30 maýsymda Perızat Qaırattyń isi sotqa jiberildi.

Eske salaıyq, eriktiler qozǵalysynyń belsendisi jáne qoǵamdyq qaıyrymdylyq qorynyń quryltaıshysy Perızat Qaıratqa qatysty tergeý júrgizilip jatqany 2024 jyly14 qarashada belgili boldy.

Sondaı-aq Joǵarǵy sot Perızat Qaırattyń sotyn tikeleı efırden kórsetý máselesin qarastyrýǵa daıyn ekenin habarlady.