Perızat Qaırattyń isine qatysty tyń málimetter paıda boldy
ASTANA. KAZINFORM — 2025 jyldyń 23 qańtarynda Perızat Qaıratqa qatysty múgedek-balalarǵa arnalǵan ońaltý ortalyǵyn salýǵa aqsha jınaý alaıaqtyǵy boıynsha sotqa deıingi jańadan tergeý tirkeldi, dep habarlaıdy QMA.
Qarjylyq monıtorıng agenttiginiń resmı ókili Ernar Taıjannyń sózinshe, Perızat Qaırat 2021 jyldyń qarasha aıynda Aqmola oblysynda «Batyr» qoǵamdyq birlestigine ońaltý ortalyǵyn salý úshin aqsha jınaý maqsatynda qaıyrymdylyq aýktsıonyn uıymdastyrǵan.
— Jurttyń senimin arttyrý úshin ońaltý ortalyǵyna muqtaj múgedek-balalar men olardyń ata-analaryn is-sharaǵa tartqan. P.Qaırat tarapynan taratylǵan jalǵan derekter boıynsha 48 mıllıon teńge jınalyp, quny 100 mıllıon teńge ǵımarat syıǵa tartylǵan. Alaıda, aýktsıon kezinde shyn máninde 22 mıllıon teńge túsken, osy aqshany ol óziniń jeke qajetine jaratqan, — dedi Taıjan.
Sonymen qatar, P.Qaırat «Batyr» qoǵamdyq birlestigi úshin quny 30 mıllıon teńge jer telimin satyp alǵanyn málimdegen, alaıda bul ýchastokti 2019 jyly birlestik ózi satyp alǵan.
— Ońaltý ortalyǵynyń qurylysy áli bastalmaǵan qalpynda tur. Ortalyqtyń qajettiligine berildi degen ǵımarat múldem joq bolyp shyqty. Sotqa deıingi tergeý jalǵasýda. Tergeý múddesine baılanysty basqa aqparat jarııalanbaıdy. Eger siz Kaırat Perızattyń alaıaqtyq áreketteriniń qurbany bolsańyz, Qazaqstan Respýblıkasynyń Qarjylyq monıtorıng agenttigine myna mekenjaı boıynsha habarlasýyńyzdy suraımyz: Astana qalasy, Beıbitshilik kóshesi, 10 nemese +7 (717-27) 0-84-78, 70-84-79 (qosymsha: 21384) telefon nómirleri arqyly, — dep eskertti vedomstvonyń resmı ókili Ernar Taıjan.
Eske sala keteıik, byltyr 14 qarashada eriktiler qozǵalysynyń belsendisi jáne qoǵamdyq qaıyrymdylyq qorynyń quryltaıshysy Perızat Qaırat ustalyp, tergeý bastalǵanyn habarlaǵan bolatynbyz.
Artynsha, Perızat Qaırat eki aı qamaýǵa alyndy.
Keıinnen Perızat Qaırat parasport federatsııasyndaǵy qyzmetinen shettetildi.
Osyǵan deıin Perızat Qaırattyń isi 100 tomnan asyp ketkenin jazǵan edik.
Sonymen qatar sot Perızat Qaırattyń dúnıe-múlkine shekteý qoıǵany habarlaǵan edi.
Budan bólek Kazinform tilshisi «Qaıyrymdylyq qorlary qansha salyq tólep júr» taqyrybynda saraptamalyq maqala jazǵan edi.