Perızat Qaırattyń avtokóligi satylymǵa shyǵaryldy
ASTANA. KAZINFORM – Sottalýshydan tárkilengen kólikterdiń biri 79 mıllıon teńgege baǵalanyp otyr. Degenmen, jyljymaly múlik memlekettik zańdy tulǵalarǵa berilýi de múmkin.
Sauda.e-qazyna.kz elektrondy saýda portalynda MERSEDES-BENZ S450 markaly avtokóliktiń quny 79 415 000 teńge dep kórsetilgen. Ol memlekettik zańdy tulǵalardyń balansyna berilýi de yqtımal. Sonymen qatar bir ǵana tulǵaǵa satýǵa ruqsat etiledi. Ótinishter 7 sáýirge deıin qabyldanady.
Qujatta jazylǵandaı, quqyq qorǵaý jáne arnaýly memlekettik organdarǵa, sondaı-aq QR Prezıdentiniń, memlekettik saıası qyzmetshilerdiń, QR Parlamenti depýtattarynyń, memlekettik organdar men olardyń apparaty qyzmetkerleriniń qyzmetin qamtamasyz etetin organdarǵa bul múlik berilmeıdi.
Habarlandyrýda avtokóliktiń 2024 jyly shyqqany, túsi qara, al memlekettik nómiri 777KPK01 ekeni jazylǵan. Bul sıpattama QR Qarjylyq monıtorıng agenttigi 2024 jyldyń jeltoqsan aıynda jarııalaǵan vıdeodaǵy Perızat Qaırattan tárkilengen kólikpen sáıkes keledi.
Sonymen birge jyljymaly múliktiń «Pandora» sıgnalızatsııaly kilti bar, shanaq nómiri W1K2231611A132480, akkýmýlıatory óshken (tehnıkalyq jaǵdaıyn tekserý múmkin emes).
MERSEDES-BENZ S450 kóligine tyıym salynǵan. Ol qazir Astanada tur. Al satýshy – QR Qarjy mınıstrligi Memlekettik múlik jáne jekeshelendirý komıtetiniń Astana qalasy memlekettik múlik jáne jekeshelendirý departamenti.
Eske salaıyq buǵan deıin Perızat Qaırat 10 jylǵa, anasy 7 jylǵa sottalǵanyn jazǵanbyz.
Sondaı-aq sot Perızat Qaırat pen anasyna shyǵarylǵan úkimdi ózgerissiz qaldyrdy.