Perızat Qaırattyń advokaty: úkim zańsyz, appelıatsııalyq tártippen daýlaımyz

ASTANA. KAZINFORM — Elorda soty «Biz birgemiz» qaıyrymdylyq qorynyń burynǵy jetekshisi Perızat Qaırat pen onyń anasy Ǵaını Alashbaevaǵa úkim shyǵardy.

— Úkimdi zańsyz jáne negizsiz dep sanaımyn. Biz ony appelıatsııalyq tártippen daýlaımyz, barlyq ýájdi apellıatsııalyq shaǵymda keltiremiz, — dedi Perızat Qaırattyń advokaty Aslanbek Dáýletııarov BAQ ókilderiniń saýalyna jaýap bere turyp.

Onyń aıtýynsha, úkimdi jarııalaǵannan keıin Perızat Qaırat pen anasy aýyr psıhologııalyq kúı keship otyr. 

Sondaı-aq qorǵaýshy Perızat Qaırattyń jábirlenýshilerge keltirgen shyǵyndy qalaı óteıtinin aıtty. 

— Tárkilengen múlik bar, ıaǵnı 4 avtokólik, 4 páter jáne jeke turǵyn úı. Bastapqy baǵalaýǵa sáıkes, olardyń jalpy quny shamamen 1 mıllıard teńge, — dep jaýap berdi advokat.

Buǵan deıin advokat Perızat Qaıratty kinásiz dep málimdegen edi. 

Aıta keteıik, sot úkimimen Perızat Qaırat 10 jylǵa, anasy 7 jylǵa sottaldy. 
Sonymen qatar Perızat Qaırat pen anasy Ǵaını Alashbaeva jábirlenýshilerdiń shyǵynyn óteýge mindetteldi. 

Odan bólek sot úkiminde Perızat Qaırat pen anasynan qansha qarjy men múlik tárkilengeni aıtylǵan. 

Sol sııaqty sot Perızat Qaıratty «Shapaǵat» memlekettik nagradasynan aıyrýdy uıǵardy.