Perızat Qaıratty tergeý ızolıatory qyzmetkerleri jaraqattaǵany ras pa
ASTANA. KAZINFORM — Astana qalasynyń Polıtsııa departamenti Perızat Qaırattyń «tergeý ızolıatory qyzmetkerleri kesirinen jaraqattanǵany» týraly málimdemesi boıynsha túsinik berdi.
— 9 maýsym kúni tergeýdegi Perızat Qaırat prokýratýra organdaryna aryz túsirip, mekeme qyzmetkeri kamera esigin kúshtep japqan kezde esik arasyna qysylyp, dene jaraqatyn alǵanyn málimdegen. Aryz boıynsha jınalǵan materıaldar Astana qalasy Polıtsııa departamentine joldanyp, qazir sotqa deıingi tergep-tekserý amaldary júrgizilip jatyr, — delingen resmı habarlamada.
Tergeý aıasynda mekemeniń beınebaqylaý kamerasyndaǵy jazba zerdelenip, qyzmetkerler men kýágerlerden jaýap alyndy.
— Alǵashqy tergeý áreketteriniń nátıjesi boıynsha Perızat Qaırat málimdegendeı, kamera esigin jabý kezinde mekeme qyzmetkerleriniń oǵan dene jaraqatyn keltirgeni rastalmady. Buǵan Perızat Qaırattyń óz aryzynda kórsetken oqıǵa sátindegi beınebaqylaý jazbasy dálel bolyp otyr, — deıdi polıtsııadan.
Qajetti tergeý áreketteri júrgizilip, tıisti saraptama taǵaıyndaldy.
Buǵan deıin elordada Perızat Qaırattyń isine qatysty aldyn ala sot otyrysy ótkenin habarlaǵan edik. Sot ishinara jabyq ótetin boldy.
Aıta ketsek, bıyl 30 maýsymda Perızat Qaırattyń isi sotqa jiberildi.
Eriktiler qozǵalysynyń belsendisi jáne qoǵamdyq qaıyrymdylyq qorynyń quryltaıshysy Perızat Qaıratqa qatysty tergeý júrgizilip jatqany 2024 jyly 14 qarashada belgili boldy.
Sondaı-aq Joǵarǵy sot Perızat Qaırattyń sotyn tikeleı efırden kórsetý máselesin qarastyrýǵa daıyn ekenin habarlady.