Perızat Qaıratqa qatysty qylmystyq isti tergeý aıaqtaldy

ASTANA. KAZINFORM — Perızat Qaırattyń isin tergeý barysynda keltirilgen shyǵyn 3,5 mlrd teńge somasynda anyqtaldy.

Bul týraly Qarjylyq monıtorıng agenttigi tóraǵasynyń orynbasary Jeńis Elemesov aıtty.

— Perızat Qaıratqa qatysty qylmystyq isti tergeý aıaqtaldy. Qazirgi kezde materıaldarmen tanystyrý protsesi júrip jatyr. Esterińizde bolsa, qylmystyq isti tergeý barysynda keltirilgen shyǵyn boıynsha ártúrli soma aıtylǵan edi. Qazir 3,5 mlrd teńge somasyndaǵy shyǵyn anyqtaldy, — dedi J. Elemesov Senattyń jalpy otyrysynan keıin tilshiler suraǵyna jaýap bere otyryp.

Onyń aıtýynsha, P. Qaırattyń tárkilengen múlki boıynsha sońǵy sheshimdi sot shyǵarady. Bul múlik zardap shekkenderge keltirilgen shyǵyndy óteýge nemese memlekettiń menshigine ótedi.

Sonymen qatar J. Elemesov atalǵan is boıynsha kúdikke Perızattyń anasy da ilikkenin naqtylady.

— Anasy úı qamaqta. Ekeýi de kúdikti. Anasyn da alaıaqtyq baby men qylmystyq jolmen tapqan aqshany jylystatý boıynsha tergeldi. Ol qyzyna kómektesip, túsken aqshany óziniń esep-shotyna aýdarǵan. Keıin osy qarajatty bankten sheship, úı men kólik satyp alǵan. Gúl satatyn dúkenderdi alýǵa kómektesken, — dedi agenttik tóraǵasynyń orynbasary.

Onyń sózine qaraǵanda, kúdikti Perızat jańa ońaltý ortalyǵynyń qurylysyna, sý tasqynynyń zardaptaryn joıýǵa, Palestınada zardap shekkenderge qarajat jınaǵan. Bul 190-bap boıynsha úsh epızod alaıaqtyq boıynsha tekserildi, olarǵa qatysty tergeý aıaqtaldy. Sondaı-aq qylmystyq jolmen tabylǵan qarajatty aktıvterge biriktirý arqyly jasyrǵan eki fakti bar.

— Dál qazir zardap shekkenderdiń naqty sanyn aıta almaımyn, olardyń sany óte kóp. Qomaqty qarjy salǵan jábirlenýshiler bar. Bul ister boıynsha Perızat Qaırat óz kinásin moıyndamaı otyr, — dedi J. Elemesov.

Eske salsaq, eriktiler qozǵalysynyń belsendisi jáne qoǵamdyq qaıyrymdylyq qorynyń quryltaıshysy Perızat Qaıratqa qatysty tergeý júrgizilip jatqany 14 qarashada belgili boldy.

Artynsha Perızat Qaırat parasport federatsııasyndaǵy qyzmetinen alyndy.

Sonymen qatar sot sanktsııasymen Perızat Qaırattyń dúnıe-múlkine shekteý qoıylǵany anyqtaldy.

Buǵan deıin Perızat Qaırat Palestına turǵyndaryna gýmanıtarlyq kómek kórsetý úshin qarajat jınaýdy uıymdastyrǵany týraly habarlaǵan edik. Bul epızod boıynsha Perızat Qaırat 200 mln teńgeden asa qarajatty jymqyrdy dep kúdiktelýde.

Keıinnen Perızat Qaırattyń isi 100 tomnan asqany málim boldy.

Al onyń «Biz birgemiz Qazaqstan 2030» qoǵamdyq birlestigi taratylǵany aıtyldy.