Perızat Qaırat 10 jylǵa, anasy 7 jylǵa sottaldy
ASTANA. KAZINFORM – Elorda soty «Biz birgemiz» qaıyrymdylyq qorynyń burynǵy jetekshisi Perızat Qaırat pen onyń anasy Ǵaını Alashbaevaǵa úkim shyǵardy.
— Perızat Qaıratty Qylmystyq kodekstiń 190-baby 4-bóliginiń 2-tarmaǵynda kózdelgen qylmysty jasaǵany úshin kináli dep tanyp, oǵan 8 jyl merzimge bas bostandyǵynan aıyrý jazasyn, sondaı-aq 10 jyl merzimge qaıyrymdylyq qyzmetpen aınalysý quqyǵynan aıyra otyryp, múlkin tárkileý túrindegi qosymsha jaza taǵaıyndaldy. Sondaı-aq Qylmystyq kodekstiń 58-babynyń 3-bóligi negizinde birneshe qylmys jasaý jıyntyǵy boıynsha jazany ishinara qosý jolymen túpkilikti 10 jyl merzimge bas bostandyǵynan aıyrý jazasy taǵaıyndaldy, — dedi Astana qalasy qylmystyq ister jónindegi aýdanaralyq sotynyń sýdıasy Sabyrjan Kárimov.
Perızat Qaırat jazasyn qaýipsizdigi ortasha deńgeıdegi mekemede óteıdi.
Odan ári sýdıa sottalýshynyń anasy Ǵaını Alashbaevaǵa úkim shyǵardy.
— Anasyn Qylmystyq kodeksiniń 190-baby 4-bóliginiń 2-tarmaǵy boıynsha kináli dep tanyp, 6 jyl merzimge bas bostandyǵynan aıyrý jazasyn, sondaı-aq 10 jyl merzimge qaıyrymdylyq qyzmetpen aınalysý quqyǵynan aıyrý jáne múlkin tárkileý túrindegi qosymsha jaza taǵaıyndalsyn. Sondaı-aq Qylmystyq kodekstiń 218-baby 3-bóliginiń 3-tarmaǵy boıynsha kináli dep tanyp, oǵan 5 jyl merzimge bas bostandyǵynan aıyrý jáne múlkin tárkileý jazasy taǵaıyndalsyn. Qylmystyq kodekstiń 58-babynyń 3-bóligine sáıkes birneshe qylmys jasaý jıyntyǵy boıynsha jazany ishinara qosý jolymen Ǵaını Alashbaevaǵa túpkilikti jaza retinde 7 jyl merzimge bas bostandyǵynan aıyrý, 10 jyl merzimge qaıyrymdylyq qyzmetpen aınalysý quqyǵynan aıyrý jáne múlkin tárkileý jazasy taǵaıyndalsyn, — dedi sýdıa.
Perızat Qaırattyń anasy da jazasyn qaýipsizdigi ortasha deńgeıdegi mekemede óteıdi.
Aıta ketsek, prokýror Perızat Qaıratty 10 jyl, anasyn 8 jyl bas bostandyǵynan aıyrýdy suraǵan edi.
Eske salaıyq, Perızat Qaırat pen onyń anasy Ǵaını Alashbaevadan jaýap alý jabyq rejımde ótti.
Atyshýly iske qatysty Úkimet basshysy Oljas Bektenov pikir bildirip, «Perızat Qaırat isi — zańnamalyq ózgerister úshin múmkindik» degen edi.
Perızat Qaırat pen anasyna taǵylǵan aıyptar týraly siltemege ótip tanysýǵa bolady.