Perızat Qaırat jábirlenýshilerdiń shyǵynyn óteýge mindetteldi — sot úkimi

ASTANA. KAZINFORM — Elorda soty «Biz birgemiz» qaıyrymdylyq qorynyń burynǵy jetekshisi Perızat Qaırat pen onyń anasy Ǵaını Alashbaevaǵa úkim shyǵardy. 

— Jábirlenýshiler men ókilderine keltirilgen materıaldyq shyǵyndy óndirip alý týraly azamattyq talaptar tolyq kólemde qanaǵattandyrylsyn. Perızat Qaırat pen Ǵaını Alashbaevadan 50 jábirlenýshiniń paıdasyna 1 mıllıard 582 mıllıon 649 myń 591 teńge kóleminde materıaldyq shyǵyndy birlesip óndirý belgilensin, — dedi Astana qalasy qylmystyq ister jónindegi aýdanaralyq sotynyń sýdıasy Sabyrjan Kárimov.

Árbir jábirlenýshige qatysty materıaldyq shyǵyn mólsheri úkimniń tolyq mátininde kórsetilgen.

— Perızat Qaırat pen Ǵaını Alashbaevadan memleket kirisine baj tártibimen, árqaısysynan 22 mıllıon 583 myń 934 teńgeden óndirip alý belgilensin. Qylmystyq-protsestik kodeksiniń 172-babyna sáıkes, azamattyq talaptarǵa qatysty úkim bóligin erikti túrde oryndaý úshin Perızat Qaırat pen Ǵaını Alashbaevaǵa úkim zańdy kúshine engen kúnnen bastap 1 aı merzim belgilensin. Atalǵan merzimnen keıin talap májbúrlep oryndatýǵa jatady, — deıdi sýdıa.

Aıta keteıik, sot úkimimen Perızat Qaırat 10 jylǵa, anasy 7 jylǵa sottaldy.