Perızat Qaırat isi: tasqyn kezinde NZM qyzmetkerleri 2,9 mln teńge joldaǵan
ASTANA. KAZINFORM — Elordada volonter, qaıyrymdylyq qory jetekshisi Perızat Qaırat pen onyń anasy Ǵaını Alashbaevaǵa qatysty qylmystyq is boıynsha zardap shekken jandardan jaýap alý jalǵasyp jatyr.
Búgin qylmystyq istiń úshinshi epızody qaralyp jatyr. Jańa Nazarbaev Zııatkerlik mektebiniń pedagog-uıymdastyrýshy-kýratory Janerke Satqymbekovadan jaýap alyndy. Onyń aıtýynsha, ata-analar, oqýshylar jáne muǵalimder atynan tasqyn kezinde, naqty aıtqanda 2024 jylǵy 10 sáýirde banktiń onlaın-qosymshasy Biz birgemiz qaıyrymdylyq qoryna 2,9 mıllıon teńge aýdarǵan.
Prokýrordyń «Nelikten dál Biz Birgemiz qoryn tańdadyńyzdar?» degen suraǵyna jábir kórýshi: «Óıtkeni, qor týraly barlyq jerde jarnamalandy, sondyqtan osy qorǵa jiberýdi sheshtik», — dep jaýap berdi.
Suraq-jaýap barysynda kúdikti Perızat Qaırat jábirlenýshige qarap, ol qarajat maqsatty túrde jumsalǵanyn alǵa tartty.
— Siz jibergen barlyq qarajat maqsatty túrde jumsaldy. Biz sý tasqyny kezinde aldyńǵy shepte bolyp, aýqymdy jumys atqardyq, — dedi sottalýshy.
Qazir sýdıa kúdikti Perızat Qaırattyń anasy Ǵaını Alashbaeva sot barysynda ózin jaısyz sezinýine baılanysty ýaqytsha úzilis jarııalady.
Buǵan deıin kúdikti Perızat Qaırat basqarǵan qaıyrymdylyq qoryna Nazarbaev mektebininiń ata-analary shamamen 1 mln teńge jınap bergeni týraly jazǵan bolatynbyz.
Odan bólek Perızat Qaırat jetekshilik etken qorǵa taǵy bir qurylys kompanııasy qorǵa 200 mln teńge aýdarǵan.
Keshe ótken sot otyrysynda Forte Bank marketıng dırektory Anton Kım tasqyn kezinde Perızat Qaırattyń qoryna jeke shotymnan jarty mıllıon teńge aýdarǵanyn aıtqan edi.
Sot otyrysynda belgili bolǵandaı Perızat Qaırat anasyn ortaǵa salyp, 23 mln teńgege gúl bıznesin satyp alǵan.
Odan bólek «Asar-Úme» qorynyń prezıdenti Ashat Nurmashev kúdikti Perızat Qaıratqa 200 mln teńge aýdarǵanyn aıtty.
Sondaı-aq tanymal bloger Oljas Sadyq sotta kýálik etý barysynda Perızat Qaıratqa 83,5 mln teńgege aldanǵanyn aıtty.
Aıta ketsek, Úkimet basshysy Oljas Bektenov Perızat Qaırattyń ústinen qozǵalǵan iske qatysty pikir bildirdi.