Perızat Qaırat isi: tanysý aıaqtaldy, is prokýratýraǵa joldandy

ASTANA. KAZINFORM — Qarjylyq monıtorıngi agenttigi Perızat Qaırat pen onyń anasy Gaını Alashbaevaǵa qatysty alaıaqtyq jáne qylmystyq jolmen alynǵan aqsha men múlikti zańdastyrý faktileri boıynsha sotqa deıingi tergep-tekserýdi aıaqtady.

Agenttik aqparatyna sáıkes, 2025 jylǵy 19 naýryzda taraptar 109 tomnan turatyn qylmystyq is materıaldarymen tanysýǵa kiristi.

Buǵan deıin habarlanǵandaı, zalal somasy 3,5 mlrd teńgeni qurady.

— Urlanǵan qarajatqa satyp alynǵan 865 mln teńge kólemindegi múlikke tyıym salyndy. Qylmystyq is aıyptaý aktisin bekitý jáne sotqa joldaý úshin Bas prokýratýraǵa berildi, — delingen habarlamada.

Eske salsaq, eriktiler qozǵalysynyń belsendisi jáne qoǵamdyq qaıyrymdylyq qorynyń quryltaıshysy Perızat Qaıratqa qatysty tergeý júrgizilip jatqany 14 qarashada belgili boldy.

Artynsha Perızat Qaırat parasport federatsııasyndaǵy qyzmetinen alyndy.

Sonymen qatar sot sanktsııasymen Perızat Qaırattyń dúnıe-múlkine shekteý qoıylǵany anyqtaldy.

Buǵan deıin Perızat Qaırat Palestına turǵyndaryna gýmanıtarlyq kómek kórsetý úshin qarajat jınaýdy uıymdastyrǵany týraly habarlaǵan edik. Bul epızod boıynsha Perızat Qaırat 200 mln teńgeden asa qarajatty jymqyrdy dep kúdiktelýde.

Keıinnen Perızat Qaırattyń isi 100 tomnan asqany málim boldy.

Al onyń «Biz birgemiz Qazaqstan 2030» qoǵamdyq birlestigi taratylǵany aıtyldy.

Sáýirdiń basynda Perızat Qaıratqa qatysty qylmystyq isti tergeý aıaqtaldy. Bul rette Perızat Qaırat jaýap berýden bas tartý quqyǵyn tańdaǵany habarlandy.

Budan bólek onyń soty qashan bastalatyny anyqtaldy.