Perızat Qaırat isi: tanymal bloger 83,5 mln teńgege aldanǵanyn aıtty
ASTANA. KAZINFORM — Astanada Perızat Qaırat pen onyń anasy Ǵaını Alashbaevaǵa qatysty 3,5 mlrd teńge kóleminde qaıyrymdylyqqa jınalǵan qarjyny jymqyrý deregi boıynsha ótip jatqan sot protsesi jalǵasyp jatyr.
Qazir is kýágerlerinen jaýap alynyp jatyr. Sotta atalǵan is boıynsha jábirlenýshi retinde tanylǵan bloger Oljas Sadyq kýálik berdi. Ol Gaza sektoryndaǵy turǵyndarǵa kómek kórsetý úshin qomaqty kólemde qaıyrymdylyq qarajatyn jınaǵandardyń biri bolǵan.
Onyń aıtýynsha, qarajat jınaý 2023 jyldyń qazan aıynyń sońynda bastalǵan. Ol dosy, bloger Názim Mısanovpen birge Instagram jelisinde vıdeo jarııalaǵan. Vıdeo mıllıondaǵan qaralym jınap, Sadyqtyń jeke bank shotyna 83,5 mıllıon teńge kóleminde qaıyrymdylyq qarajaty túsken.
Bastapqyda ol jınalǵan qarajatty ıÝNISEF arqyly jiberýdi josparlaǵan. Alaıda, kóp uzamaı onymen Perızat Qaırat baılanysqa shyǵyp, qor jumysy týraly aıtyp, gýmanıtarlyq mıssııa sátiniń fotolaryn kórsetken jáne Qazaqstandaǵy Palestına elshiligimen kelisimshart negizinde jumys isteıtinin jetkizgen. Osy dálelden keıin Oljas Sadyq Perızat Qaıratqa senim artqan.
Qarajatty aýdarǵannan keıin, ol Perızat Qaıratpen birge Abý-Dabıge ushyp barǵan. Kýágerdiń aıtýynsha, ushý, turý jáne tamaq shyǵynyn aıyptalýshy ózi tólegen.
Qazaqstanǵa oralǵannan keıin jábirlenýshi birneshe ret kómek kórsetkenin rastaıtyn qujat suraǵan. Alaıda, onyń aıtýynsha, Perızat Qaırat baılanysqa shyqpaı qoıǵan.
Sotta Oljas Sadyq gýmanıtarlyq mıssııany aıaqtaý úshin qaıtadan ıÝNISEF-ke júginetinin de málim etti.
Buǵan deıin «Asar-Úme» qorynyń prezıdenti Ashat Nurmashev kúdikti Perızat Qaıratqa 200 mln teńge aýdarǵanyn aıtty.
Aıta ketsek, búgin Úkimet basshysy Oljas Bektenov Perızat Qaırattyń ústinen qozǵalǵan iske qatysty pikir bildirdi.