Perızat Qaırat isi: taǵy bir qurylys kompanııasy qorǵa 200 mln teńge aýdarǵan
ASTANA. KAZINFORM — Elordada Biz birgemiz qorynyń jetekshisi bolǵan Perızat Qaırat pen onyń anasyna qatysty sot otyrysy úshinshi kúnge jalǵasty.
Búgingi sot otyrysy kýágerlerden jaýap alýdan bastaldy. Sotta «Stroıkonstrýktsııa» AQ-nyń ókili, zańger Galına Isaeva jaýap berdi. Onyń aıtýynsha, kompanııa 2024 jylǵy sý tasqyny kezinde Perızat Qaırattyń qoryna 200 mıllıon teńge aýdarǵan.
Kýágerdiń málimdeýinshe, qurylys kompanııasy Biz birgemiz qorymen baılanysqa shyqqan. Sondaı-aq kompanııa basshylyǵy qaıyrymdylyq uıymy týraly áleýmettik jelilerdegi beınerolıkter men jarnama jáne ashyq aqparat kózderinen bilgen.
2024 jylǵy 2 mamyrda sý tasqynynan zardap shekken jandarǵa kómek kórsetý týraly sheshim qabyldanǵan. Al 10 mamyrda kompanııa Perızat Qaırat qorynyń shotyna 200 mıllıon teńge aýdarǵan. Qordyń rekvızıti jarnamadaǵy beınerolıkten alynǵan.
Odan bólek Galına Isaeva ınternetke ornalastyrylǵan materıaldar kompanııa basshylyǵynyń sheshimine áser etkenin aıtty.
— Nelikten men jarnamany basshyma apardym? Onda Perızat Qaırattyń «nesıeni toqtatyńdar» degen sııaqty ótinishi bolǵan. Bul bizge áser qaldyrdy. Sebebi, adamdar rasymen qıyn jaǵdaıda edi, — dedi ol sotta.
Onyń aıtýynsha, qorǵa iri kompanııalar men bankterdiń qomaqty qarjy aýdarýy atalǵan uıymǵa degen senimdi arttyrǵan.
Keshe ótken sot otyrysynda Forte Bank marketıng dırektory Anton Kım tasqyn kezinde Perızat Qaırattyń qoryna jeke shotymnan jarty mıllıon teńge aýdarǵanyn aıtqan edi.
Sot otyrysynda belgili bolǵandaı, Perızat Qaırat anasyn ortaǵa salyp, 23 mln teńgege gúl bıznesin satyp alǵan.
Buǵan deıin «Asar-Úme» qorynyń prezıdenti Ashat Nurmashev kúdikti Perızat Qaıratqa 200 mln teńge aýdarǵanyn aıtty.
Sondaı-aq tanymal bloger Oljas Sadyq sotta kýálik etý barysynda Perızat Qaıratqa 83,5 mln teńgege aldanǵanyn aıtty.
Aıta ketsek, Úkimet basshysy Oljas Bektenov Perızat Qaırattyń ústinen qozǵalǵan iske qatysty pikir bildirdi.