Perızat Qaırat isi: kýágerler sotqa kelmeı jatyr
ASTANA. KAZINFORM — Astanada Biz birgemiz qaıyrymdylyq qorynyń burynǵy jetekshisi, volonter Perızat Qaırat pen onyń anasy Ǵaını Alashbaevaǵa qatysty sot otyrysynda kýágerlerden jaýap alý protsesi jalǵasyp jatyr.
Búgingi eki jábirlenýshi jáne bir jábirlenýshi taraptyń ókili sot otyrysyna kelmedi.
Prokýror Mádına Orazalına jábirlenýshilerdiń tergeý kezinde alynǵan jaýaptaryn oqyp berdi. Onyń aıtýynsha, jábirlenýshi Jálelov, Buharbaev jáne Kýrmaevanyń ornalasqan jerin anyqtaý jáne baılanys ornatý boıynsha jedel shara nátıje bermegen. Qyzmetkerler kórsetilgen mekenjaıǵa baryp, uıaly telefon arqyly habarlasýǵa jáne jaqyn týystary arqyly baılanysýǵa tyrysqan, biraq, nátıje bolmaǵan.
— Osyǵan baılanysty Qarjylyq monıtorıng agenttiginiń jedel ýákili raport jasady, — dedi prokýror sot zalynda.
Jarııalanǵan jaýapqa sáıkes, «Aneko L» JShS 3 mln teńge aýdarǵan. Bul aýdarym kelisimsharttyq mindettemesiz jasalǵan. Jaýapta kórsetilgendeı, Perızat Qaırat jetekshilik etken qor týraly áleýmettik jelilerde belsendi jarnama júrgendikten, kompanııa basshylyǵy qarajatty sý tasqynynan zardap shekken jandarǵa kómek retinde sol qorǵa jiberýdi uıǵarǵan.
Taǵy bir jábirlenýshi Manarbek Buharbaev jaýabynda 2024 jyldyń sáýir aıynyń basynda áleýmettik jeli arqyly «Biz Birgemiz Kazakhstan 2030» qory sý tasqynynan zardap shekkenderge kómek jınap jatqanyn bilgenin aıtty. Ol basqaratyn Mańǵystaý oblysy boıynsha qazynashylyq departamentiniń atynan 231 500 teńge aýdarǵan. Atalǵan soma departament qyzmetkerlerinen qaıyrymdylyq maqsatynda jınalǵan. Jaýapta kórsetilgendeı, qarajattyń qalaı jumsalǵany týraly eshqandaı esep almaǵan.
Prokýror málimdegendeı, taǵy bir jábirlenýshi Natalıa Kýrmaeva Perızat Qaırat basqarǵan qordyń esepshotyna óz qaltasynan 60 myń teńge aýdarǵan. Ol qor ókilderin tanymaǵan, tek bank qosymshasynda qor ataýy turǵandyqtan senim artqan.
Buǵan deıin Perızat Qaırat daıyn dıplom satyp alǵysy kelgen áreketi týraly jazǵan edik.
Sondaı-aq kýáger Perızat Qaırat qor qarjysyn qalaı qolma-qol aqshaǵa aýdarǵanyn aıtyp berdi.
Sot barysynda áıgili ánshi, otandasymyz Dımash Qudaıbergenniń esimi ataldy.
Belgili bolǵandaı tasqyn kezinde Nazarbaev zııatkerlik mektebiniń qyzmetkerleri 2,9 mln teńge joldaǵan.
Іsti qaraý kezinde Perızat Qaırat jetekshilik etken qorǵa qarjy aýdarǵan 47 adam jábirlenýshi dep tanyldy.