Perızat Qaırat isi qaıyrymdylyq qorlarǵa sabaq boldy ma
ASTANA. KAZINFORM — «Asar-Úme» qaıyrymdylyq qorynyń jetekshisi Ashat Nurmashev BIZDIÑ ORTA podkastynda Biz Birgemiz qaıyrymdylyq qorynyń burynǵy jetekshisi Perızat Qaırattyń isine qatysty oıyn ortaǵa saldy.
Eske sala ketsek, «Asar-Úme» qaıyrymdylyq qorynyń basshysy Ashat Nurmashev Perızat Qaırat jetekshilik etken qorǵa 200 mln teńge aýdarǵan.
— Sot ótti. Úkim shyqty. Biz Perızat Qaırattyń qoryn tanys bolsa da tekserdik. Óıtkeni, 2021-2023 jyldary onyń adaldyǵyna kúmán túsken sebepter de bolmaǵan, eshkim olaı oılamaǵan. Biz aqsha jınap bolsaq ta, birden ol qorǵa aýdarmadyq. Óıtkeni, ol kisi aıtatyn Abý-Dabıde halyqaralyq gýmanıtarlyq hab qoımasy bar, mende akkredıtatsııa bar, Gaza sektordyń jazyqsyz japa shekken halqyna kómektiń birinshi partııasy ketti degen edi. Biz senbeı, áriptesterimizben apara alasyń ba dedik, rasymen sóz joq, biz bardyq kórdik, Abý-Dabıge bardyq, shynymen akkredıtatsııasy bar, shyǵyndy ózi tóledi, — dedi Ashat Nurmashev podkast barysynda.
Onyń aıtýynsha, Perızat Qaırattyń Palestına elshiligimen de kelisimsharty bolǵan.
— Keıin Palestına jáne arab elderiniń elshisimen tanystyrdy. Bir aıdan soń kelisimshart jasasyp, aqshany qorǵa aýdardyq. Kelisimshart boıynsha 2023 jyldyń qarasha aıynda qarjy aýdardyq, jeltoqsanda búkil esepti tapsyrý kerek bolatyn, biraq esep sozyldy. Onyń birneshe sebebi boldy jáne de qańtarda esep tapsyrmasań sotqa beremiz dep tike aıttyq. Esepti tapsyrdy, biraq qabyldaǵan joqpyz. Sot sheshimi aıdan anyq, qujattar qoldan jasalǵan bolyp shyqty, ıaǵnı aqsha ketpegen. Biz ol kezde maman bolmaǵandyqtan anyqtaı almadyq. Sotta boldyq, kýágerlerdiń aıtýy boıynsha qarashadan aýdardyq, jeltoqsan aıynda qymbat kólikter, páterler alyp jatty, tańǵaldyq, — deıdi ol.
Eske salsaq, 25 shildede elorda soty «Biz birgemiz» qaıyrymdylyq qorynyń burynǵy jetekshisi Perızat Qaırat pen onyń anasy Ǵaını Alashbaevaǵa úkim shyǵardy. Perızat Qaırat 10 jylǵa, anasy 7 jylǵa sottaldy.
Keıinnen Perızat Qaırattyń advokaty úkim zańsyz ekenin, appelıatsııalyq tártippen daýlaıtynyn aıtty.