Perızat Qaırat isi: Biz birgemiz qorynyń quryltaıshylary hattamaǵa qol qoımaǵanyn aıtty
ASTANA. KAZINFORM – Elordada eriktiler qozǵalysynyń belsendisi jáne qoǵamdyq qaıyrymdylyq qor quryltaıshysy Perızat Qaıratqa qatysty sot otyrysynda kýágerlerden jaýap alynyp jatyr.
Sot barysynda kýágerlerdiń biri Sergeı Matıýshenkodan jaýap alyndy. Ol - buryn «Jas Otan» jastar qanatynda (sol kezdegi Nur Otan partııasynyń janyndaǵy) volonter bolǵan jáne «Biz birgemiz Qazaqstan-2030» qoǵamdyq birlestiginiń quryltaıshylarynyń biri retinde kórsetilgen tulǵa.
- Perızat Qaırat pandemııa kezinde qaıyrymdylyqpen belsendi aınalysty, ıaǵnı maska taratyp, otbasylarǵa kómek kórsetti. 2021 jyly Perızat meni keńsege shaqyryp, birlestikti qurý týraly hattamany tapsyrdy. Qujatta tulǵalardyń aty-jóni men qoltańbalary aldyn ala qoıylyp turǵan edi. Meniń quryltaıshy bolýǵa kelisimimdi surap, qol qoıýymdy usyndy, - degen túsinik berdi Sergeı Matıýshenko.
Alaıda kýáger ekinshi hattamaǵa qatysy joǵyn aıtyp, qujatqa qoıylǵan qoldy úzildi-kesildi joqqa shyǵardy. Odan ári kúdikti Perızat Qaırat pen kýáger Sergeı Matıýshenkonyń arasynda kishigirim dıalog júrdi.
– Sergeı, sen ekinshi hattamaǵa qol qoıǵan joqsyń ba? Qazir meniń taǵdyrym sheshilip jatqanyn túsinesiń be?
– Perızat, men ekinshi hattamaǵa qol qoıǵan joqpyn.
Odan bólek, sot tergeýi barysynda «Biz birgemiz Qazaqstan-2030» qoǵamdyq birlestiginiń quryltaıshysy retinde jaýap bergen taǵy eki kýáger hattamadaǵy qoldy moıyndamady, ıaǵnı olar hattamaǵa qol qoımaǵan.
Sot otyrysy jalǵasyp jatyr.
Buǵan deıin memlekettik aıyptaýshy Perızat Qaırat pen onyń anasyna taǵylǵan aıyptardy tizbektep shyqty.
Sýdıa suraǵyna jaýap bergen Perızat Qaırat aıyptar negizsiz taǵyldy dep, moıyndamaıtynyn jetkizdi.
burynǵy «Nur Otan» (qazirgi Amanat) partııasy tóraǵasynyń birinshi orynbasary bolǵan, Almaty qalasynyń eks-ákimi Baýyrjan Baıbektiń esimin atap ótti.
Memlekettik aıyptalýshy Perızat Qaırat pen anasy Ǵaını Alashbaeva 3,5 mlrd teńgeniń qaıda jumsalǵanyn tizip berdi.
Aıta ketsek, buǵan deıin de Perızat Qaırat ózine taǵylǵan aıyptarmen kelispedi.
Sondaı-aq Perızat Qaırat tergeý ızolıatory qyzmetkerlerinen jábir kórgenin aıtqan edi. Artynsha elorda polıtsııasy tergeý ızolıatorynda bolǵan jaıttyń vıdeosyn kórsetti.
Belgili bolǵandaı, Perızat Qaırattyń soty ishinara jabyq ótedi.
Buǵan deıin elordada Perızat Qaırattyń isine qatysty aldyn ala sot otyrysy ótti.
Bıyl 30 maýsymda Perızat Qaırattyń isi sotqa jiberildi.
Eske salaıyq, eriktiler qozǵalysynyń belsendisi jáne qoǵamdyq qaıyrymdylyq qor quryltaıshysy Perızat Qaıratqa qatysty tergeý júrgizilip jatqany 2024 jyly 14 qarashada belgili boldy.