Perızat Qaırat pen anasynan qansha qarjy men múlik tárkilendi

ASTANA. KAZINFORM — Elorda soty «Biz birgemiz» qaıyrymdylyq qorynyń burynǵy jetekshisi Perızat Qaırat pen onyń anasy Ǵaını Alashbaevaǵa úkim shyǵardy.

Sot úkimimen Perızat Qaırat pen onyń anasy Ǵaını Alashbaevadan memleketke tárkilengen múlik tizimi jáne qarjy kólemi:

— «Vela Village» kottedj qalashyǵyndaǵy jeke úı;

— «Akbulak Riviera», «Sensata Plaza», «Highvill Ishim Gold», «Kók Jaılaý» turǵyn úı keshenderindegi páterler men avtoturaqtar;

— «Mercedes-Benz S450» 2024 j., «Lexus LX 600» 2024 j;

— «Rebel Flowers» JShS-niń jarǵylyq kapıtalyndaǵy 100% úlesi;

— 97 mln teńgeden astam qarajat jáne 22 myń AQSh dollary tárkilendi.

— Perızat Qaırat pen Ǵaını Alashbaevanyń adamdarmen aldyn ala sóz baılasý arqyly birneshe ret ári asa iri kólemde jasalǵan alaıaqtyq, sondaı-aq qylmystyq jolmen alynǵan qarajatty zańdastyrý áreketi jınalǵan dáleldemelermen, jábirlenýshiler men kýágerlerdiń aıǵaǵymen, bank qujattary jáne zattaı tolyq dáleldendi, — dedi Astana qalasy qylmystyq ister jónindegi aýdanaralyq sotynyń sýdıasy Sabyrjan Kárimov.

Sýdıanyń málimdeýinshe, alaıaqtyqtyń tásil — qaıyrymdylyq jasaý maqsatyn syltaýratyp, jalǵan qor qurý arqyly júzege asyrylǵan.

— Bul áreket qoǵamda qaıyrymdylyq uǵymyna syzat túsirip, azamattar arasynda ıgi isterge degen kúmán týǵyzdy. Іste jeńildetetin mán-jaı joq. Sottalýshylar qylmysty elde tótenshe jaǵdaı kezeńinde jasaǵany isti aýyrlatatyn mán-jaı dep tanyldy. Keltirilgen asa iri mólsherdegi zalal ótelmegen. Osy jaıtty eskere otyryp, sot bas bostandyǵynan aıyrý túrindegi jazany ádil dep esepteıdi, — dep qorytyndylady sýdıa.

Aıta keteıik, sot úkimimen Perızat Qaırat 10 jylǵa, anasy 7 jylǵa sottaldy. 

Sondaı-aq sot úkimimen Perızat Qaırat pen anasy Ǵaını Alashbaeva jábirlenýshilerdiń shyǵynyn óteýge mindetteldi.