Perızat Qaırat pen anasyna qandaı aıyptar taǵyldy
ASTANA. KAZINFORM – Eriktiler qozǵalysynyń belsendisi jáne qoǵamdyq qaıyrymdylyq qorynyń quryltaıshysy Perızat Qaırat pen onyń anasy Ǵaını Alashbaevaǵa qatysty qylmystyq is boıynsha sotta prokýrorlar alaıaqtyq, qylmystyq jolmen alynǵan kiristerdi zańdastyrý jáne azamattardyń senimin asyra paıdalaný faktilerin qamtıtyn aıyptaý aktisin jarııa etti.
Aıyptaýmen prokýrorlar (memlekettik aıyptaýshy) Arman Kezeken men Mádına Orazalına tanystyrdy.
Tergeý materıaldaryna sáıkes, Perızat Qaırat pen anasy Ǵaını Alashbaeva aldyn ala sóz baılasý arqyly top bolyp áreket etken. Aıyptaý nusqasyna sáıkes, 2021 jyldan 2024 jylǵa deıin olar qaıyrymdylyq kómegi syltaýymen jeke jáne zańdy tulǵalardan qarajat jınap, onyń basym bóligin óz qajettilikterine jumsaǵan.
Jalǵan qaıyrymdylyq uıymyn qurý
Perızat Qaırat Astanada tirkelgen «Biz Birgemiz Qazaqstan 2030» qoǵamdyq birlestigin qurýdy bastaǵan. Aıyptaý boıynsha, ol quryltaıshylardyń qoltańbalaryn qoldan jasap, bank shottaryn óz atyna jáne anasynyń atyna ashyp, áleýmettik jelilerde belsendi jumys júrgizip, qaıyrymdylyqqa aqsha jınaǵan. Keıin bul qarajattar qolma-qol aqshaǵa aınaldyrylyp, jeke qajetine, ıaǵnı qymbat zattar satyp alýǵa, saıahat pen jyljymaıtyn múlikke jumsaǵan.
Balalar men zardap shekkenderge kómek kórsetý syltaýymen qarajat jınaý
Aıyptaýda 2021 jyly P. Qaırat múmkindigi shekteýli balalarǵa arnalǵan ońaltý ortalyǵyn salý maqsatynda qaıyrymdylyq aýktsıonyn uıymdastyrǵany aıtylǵan. Osy shara barysynda 21,6 mln teńge jınalǵan, biraq onyń eleýli bóligi meıramhanaǵa, gúl alýǵa, kıim-keshekke jáne jeke qajettilikterge jumsalǵan.
2023 jyly ol Qazaqstandaǵy Palestına elshiligimen Gaza sektoryna gýmanıtarlyq kómek jınaý týraly kelisim jasaǵan. Alaıda, aıyptaý aktisinde kórsetilgendeı, jınalǵan 566 mln teńgeniń tek 7,4 mıllıony ǵana maqsatty túrde aýdarylǵan. Qalǵan qarajatqa Mercedes-Benz EQE kóligi, Sensata Plaza turǵyn úı kesheninen páter alǵan jáne basqa da jeke shyǵyndar jabylǵan.
2024 jylǵy sý tasqyny
2024 jylǵy naýryzda Qazaqstanda bastalǵan sý tasqyny kezinde aıyptalýshylar, aıyptaý nusqasy boıynsha, azamattardyń emotsııalyq kúıin paıdalanyp, taǵy bir ret qarajat jınaý naýqanyn bastaǵan. Jalpy 2,86 mlrd teńge jınalǵan. Aıyptaýǵa sáıkes, bul qarajat brendti kıimder, zergerlik buıymdar, kólikter (onyń ishinde Lexus pen Mercedes-Benz S 450), páterler men kottedjder satyp alýǵa, jóndeý jumystaryna jáne sheteldik saparlarǵa jumsalǵan.
Qylmystyq jolmen alynǵan kiristerdi zańdastyrý
Prokýrordyń málimetinshe, Perızat Qaırat pen Ǵaını Alashbaeva 1 mlrd teńgeden astam qarajatty zańdy aınalymǵa engizip, múlikterdiń bir bóligin týystarynyń atyna rásimdegen. Sonyń ishinde – 23 mln teńgege satyp alynǵan «Rebel Flowers» gúl bıznesi de bar. Bul bıznes keıin qosymsha tabys kózine aınalǵan.
Osylaısha, úsh jyl ishinde qaıyrymdylyq syltaýymen 3,4 mlrd teńge urlanǵan.
Aıyptaý aktisine sáıkes, Perızat Qaırat pen Ǵaını Alashbaevaǵa Qazaqstan Respýblıkasy Qylmystyq kodeksiniń 190-baby 4-bóligi 2-tarmaǵy (asa iri kólemde, adamdar toby bolyp jasaǵan alaıaqtyq) jáne 218-baby 3-bóligi 3-tarmaǵy (qylmystyq jolmen alynǵan aqsha qarajatyn zańdastyrý) boıynsha qylmystyq quqyq buzýshylyq jasady degen aıyp taǵylyp otyr.
Sot otyrysy jalǵasyp jatyr.
Aıta ketsek, Perızat Qaırat ózine taǵylǵan aıyptarmen kelispeı otyr.
Sondaı-aq Perızat Qaırat tergeý ızolıatory qyzmetkerlerinen jábir kórgenin aıtqan edi. Artynsha elorda polıtsııasy tergeý ızolıatorynda bolǵan jaıttyń vıdeosyn kórsetti.
Belgili bolǵandaı Perızat Qaırattyń soty ishinara jabyq ótedi.
Buǵan deıin elordada Perızat Qaırattyń isine qatysty aldyn ala sot otyrysy ótti.
Bıyl 30 maýsymda Perızat Qaırattyń isi sotqa jiberildi.
Eske salaıyq, eriktiler qozǵalysynyń belsendisi jáne qoǵamdyq qaıyrymdylyq qorynyń quryltaıshysy Perızat Qaıratqa qatysty tergeý júrgizilip jatqany 2024 jyly 14 qarashada belgili boldy.