Perızat Qaırat Palestınaǵa qarajatty nelikten qolma-qol jetkizgenin aıtty

ASTANA. KAZINFORM – Astanada «Birgemiz» qaıyrymdylyq qorynyń burynǵy jetekshisi, volonter Perızat Qaırat pen onyń anasy Ǵaını Alashbaevaǵa qatysty sot sózjarysynda kúdiktiniń buǵan deıin jabyq tergeýde bergen keı jaýaptary jarııalandy.

– Atalǵan aıyptaý boıynsha Perızat Qaırat óz kinásin moıyndaǵan joq jáne sotqa qarajat qolma-qol túrde Palestına aýmaǵyna jetkizilgenin aıtty. Onyń aıtýynsha, eger qarajat bank arqyly aýdarylsa, bul áreket áskerı qaqtyǵysty qarjylandyrý retinde baǵalanýy múmkin edi. P.Qaırat shetelge jıi shyǵýyn osy sebeppen túsindirýge tyrysty. Alaıda, qurmetti sot, bul saparlar Birikken Arab Ámirlikterindegi qymbat saýda-sattyqpen qatar júrgen, – dedi prokýror Arman Qyzyken.

Tergeý derekterine sáıkes, Perızat Qaırat pen onyń anasy Palestına halqyna gýmanıtarlyq kómek kórsetýge arnalǵan qaıyrymdylyq naýqanynda jınalǵan 559 mıllıon teńgeni jymqyrdy degen kúdikke ilingen.

Aıyptaýshy taraptyń málimetinshe, keıin bul qarajat Rebel Flowers gúl dúkenin satyp alý arqyly zańdastyrylǵan.

Buǵan deıingi sottaǵy sóz jarysynda memlekettik aıyptaýshy Madına Orazalına Perızat Qaırattyń isi áleýmettik turǵydan sezimtal taqyryptardy bas paıdasyna qoldanýǵa tyrysatyndarǵa sabaq bolýy keregin aıtqan edi.

Sot tergeýi jalǵasyp jatyr.

Eske sala ketsek, Perızat Qaırat daıyn dıplom satyp alǵysy kelgen áreketi týraly jazǵan edik. 

Sondaı-aq kýáger Perızat Qaırat qor qarjysyn qalaı qolma-qol aqshaǵa aýdarǵanyn aıtyp berdi. 

Sot barysynda áıgili ánshi, otandasymyz Dımash Qudaıbergenniń esimi ataldy.

Belgili bolǵandaı tasqyn kezinde Nazarbaev zııatkerlik mektebiniń qyzmetkerleri 2,9 mln teńge joldaǵan. 

Іsti qaraý kezinde Perızat Qaırat jetekshilik etken qorǵa qarjy aýdarǵan 47 adam jábirlenýshi dep tanyldy.