Perızat Qaırat keısinen keıin qaıyrymdylyq qorlar qyzmetine tekserý júre me

ASTANA. KAZINFORM – Elordada ústinen is qozǵalyp jatqan qoǵam belsendisi Perızat Qaıratqa qatysty isten keıin qazaqstandyqtardyń kókeıinde qaıyrymdylyq qorlarynyń qyzmetine qatysty saýal kóp.

Búgin Úkimet úıinde ótken baspasóz máslıhatynda Premer-mınıstrdiń orynbasary Ermek Kósherbaevqa «Іsti bolyp jatqan Perızat Qaırat jetekshilik etken «Biz birgemiz» qorynyń mıllıardtaǵan qarjysy qoldy bolýyna baılanysty basqa da qor, uıymdardyń qyzmeti tekserile me?» degen saýal qoıyldy.

- Bıyl sáýirde osy salamen aınalysatyn quzyrly mınıstrlik ókilderin jınadym. Bul másele bárimizdi de tolǵandyrady. Shyn máninde naqty kómek kórsetip júrgen jaýapty qorlar bar. Biraq qaıyrymdylyqty jeleý etip, ásirese, áleýmettik jelilerde áreket etetinder de bar. Bul tek qorlarǵa ǵana qatysty emes, keıbir azamattar fotosýretter jarııalap, keıin halyq sol jerge qarajat aýdarady, biraq, onyń naqty qaıda ketetinin túsinbeı jatady. Bul másele zań jaǵynan da jetkilikti rettelmegen, ıaǵnı qarajattyń qaıda ketip jatqanyn baqylaý múmkin emes. Tek Perızat Qaıratqa qatysty jaǵdaı ǵana emes, soǵan uqsas basqa da qorlarǵa qatysty oqıǵa ashylyp otyr. Biraq, ondaı jaıttar quqyq qorǵaý organdarynyń nazaryna ilikkende ǵana kórinip jatyr, - dep jaýap berdi Ermek Kósherbaev.

Osy oraıda Úkimet basshysynyń orynbasary atalǵan salaǵa tıisti zańnamalyq ózgerister men basqa da retteýshi fýnktsııalardy engizý qajettigin aıtyp otyr.

- Qaıyrymdylyq - memleket tikeleı aralaspaıtyn sala. Memleket qorlardyń qyzmetine aralasa almaıdy, óıtkeni qoǵamdyq bastama nemese azamattardyń bastamasymen júzege asyrylady. Keıbireýler bul isti ómir súrý kózine aınaldyrsa, keıbireýler shynymen volonterlermen birlesip jumys istep, kómek kórsetedi. Biz mundaı jaǵdaıdyń kýási bolyp júrmiz, - dep tolyqtyrdy vıtse-premer.

Sondaı-aq Ermek Kósherbaev salany tolyq zerttep, talqylap bolǵan soń, tıisti zańnamaǵa ózgerister engiziletinin aıtty.

- Másele qoǵam talqysyna shyǵarylady, depýtattarmen birlesip qaralady. Bul salany mindetti túrde rettep, baqylaýǵa alý qajet. Adamdar aqshasyn qaıda jiberilip jatqanyn kórip, ol qarajattyń shynymen bastapqyda aıtylǵan maqsatqa jumsalyp jatqanyn bilýi tıis. Bizdiń azamattardyń júregi jumsaq, kómekteskisi kelip turady. Bul rette memleket naqty kómek kórsete alatyn uıymdardyń ǵana jumys isteýin qamtamasyz etýi tıis, - dep qorytyndylady Úkimet basshysynyń orynbasary.

Aıta keteıik, búginde elordada «Biz birgemiz» qorynyń burynǵy jetekshisi Perızat Qaırat pen onyń anasy Ǵaını Alashbaevaǵa qatysty sot ótip jatyr. Prokýror Perızat Qaıratty 10 jyl, anasyn 8 jyl bas bostandyǵynan aıyrýdy surap otyr. 

Buǵan deıin habarlaǵanymyzdaı endi elimizdegi qaıyrymdylyq qorlary BAQ-ta esep jarııalaýǵa mindetteledi.